Soňky habarlar

Arhiw

Türkmenistanda ahalteke atlarynyň marafony geçirildi, Urumçiden Aşgabada dowamly howa gatnawlary gaýtadan dikeldildi, üç sany türkmen kinofilmi Koreýadaky festiwala iberildi we beýleki habarlar

11:0526.04.2023
0
24010

Türkmenistanda

1. Ahal welaýatynyň Ak bugdaý etrabynda Türkmen bedewiniň milli baýramyna bagyşlanan atlaryň marafon ýaryşy geçirildi. Ýaryşa Türkmenistanyň Prezidentiniň Ahalteke atçylyk toplumyndan, Milii ahalteke atçylyk sport toplumyndan, Halkara atçylyk sport merkezinden we Türkmenistanyň Goranmak ministrliginden 19 bedew gatnaşdy. Pellehana ilkinji bolup Türkmenistanyň Prezidentiniň Ahalteke atçylyk toplumyndan Gaýduw atly gara at geldi. Ýeňiji 2 sagat 36 minut 21 sekund netije görkezdi.

2. Hytaýyň «China Southern Airlines» awiakompaniýasy Urumçiden Türkmenistanyň paýtagtyna dowamly howa gatnawlary gaýtadan dikeltdi. Howa gatnawlary gaýtadan ýola goýlansoň, Urumçiden gaýdan ilkinji uçar sişenbe agşamy Aşgabadyň Halkara howa menziline gondy. «China Southern Airlines» Urumçiden Aşgabada göni dowamly howa gatnawlaryny hepdede bir gezek amala aşyrar.

3. Oguzhan adyndaky «Türkmenfilm» birleşigi tarapyndan surata düşürilen üç sany kinofilm Merkezi Aziýa kinosynyň festiwalyna gatnaşmak üçin Koreýa Respublikasyna iberildi. Olar – Arslan Eýeberdiýewiň «Istärin», Sahysalyh Baýramowyň «Gyzyl kürte» we Hekim Alowowyň «Gyzyl alma» atly filmleridir. Festiwalyň açylyş dabarsy 28-nji aprelde Şinhan uniwersitetinde geçiriler, 29-njy aprelde bolsa filmleriň görkezilişi guralar.

4. Türkmenistan we Gyrgyzystan gümrük işi ulgamynda döwletara ylalaşyk baglaşmagy meýilleşdirýärler. Türkmenistanyň Döwlet gümrük gullugynyň başlygy Maksat Hudaýgulyýew bilen Gyrgyz Respublikasynyň Türkmenistandaky ilçisi Azizbek Madmarowyň arasynda geçirilen duşuşygyň dowamynda bu mesele ara alnyp maslahatlaşyldy. Taraplar iki ýurduň gümrük edaralarynyň arasynda dürli ugurlar boýunça hyzmatdaşlygy ösdürmek üçin esas goýujy bolup hyzmat etjek gümrük işi ulgamynda döwletara ylalaşygyny baglaşmagyň wajypdygyny nygtadylar.

5. «Airbus» «Türkmenistan» awiakompaniýasy üçin «A330» kysymly ikinji ýük uçaryny reňklemek işlerini tamamlady. «Türkmen howa ýollarynyň» şekili çekilen uçaryň Şennon şäheriniň howa menzilinde alnan suratlary ýöriteleşdirilen awiasiýa çeşmelerinde peýda boldy. EZ-F430 belgi bilen hasaba alnan howa gämisiniň şu aýda türkmen awiakompaniýasyna gowşurylmagyna garaşylýar.

Dünýäde

6. Özbegistanyň Prezidenti Şawkat Mirziýoýew Özbegistanyň DIM-niň ýolbaşçysynyň wezipe borçlaryny ýerine ýetiren Bahtiýor Saidowy respublikanyň daşary işler ministri wezipesine belledi. Bahtiýor Saidow 2022-nji ýylyň dekabryndan bäri Özbegistan Respublikasynyň daşary işler ministriniň wezipe borçlaryny wagtlaýyn ýerine ýetirýärdi. Ol ozal Özbegistanyň milli bilim ministri hökmünde işledi, Özbegistanyň Hytaýdaky, Mongoliýadaky we Filippinlerdäki ilçisi wezipelerinde zähmet çekdi.

7. ABŞ-niň Prezidenti Jo Baýden 2024-nji ýylda ABŞ-niň Prezidentiniň saýlawlarynda öz dalaşgärligini öňe sürjekdigini yglan etdi. «Men ABŞ-niň Prezidenti wezipesine gaýtadan saýlanmagy göz öňünde tutýaryn, çünki men Amerikany tanaýaryn» diýip, Baýden özüniň «YouTube» kanalynda ýerleşdirilen wideoýüzlenmesinde belläp geçdi. Şeýle hem ol amerikalylary dalaşgäriligini goldamak üçin, onuň saýlawdan öňki çäreleriniň saýtynda hasaba alynmaga çagyrdy. Baýden – 2021-nji ýylyň 20-nji ýanwaryndan bäri ABŞ-niň 46-njy Prezidentidir. Bu onuň döwlet Baştutany wezipesindäki birinji möhletidir.

Sport habarlary

8. Futbol boýunça Türkmenistanyň çempionatynyň Ýokary ligasynyň 3-nji tapgyrynyň maksatnamasy sişenbe güni dört sany duşuşyk bilen tamamlandy. Oýun güni wakalara baý boldy: çempionatyň öňdebaryjysy bolan Aşgabadyň «Köpetdag» topary öz meýdançasyndan «Arkadag» toparyndan ýeňildi, «Nebitçi» myhmançylykda paýtagtyň «Aşgabadyndan» üstün çykyp, çempionatyň sanawynda birinji orna geçdi, Marynyň «Merw» we «Energetik» toparlary bolsa bir wagtda möwsümdäki ilkinji utuklaryny gazandylar. Futbol boýunça Türkmenistanyň çempionatynyň 4-nji tapgyry 28-nji aprelde anna güni «Altyn asyr» – «Merw» we «Ahal» – «Köpetdag» duşuşyklary bilen badalga alar, «Energetik» – «Aşgabat» we «Arkadag» – «Şagadam» duşuşyklary bolsa 29-njy aprelde şenbe güni geçiriler.

9. 21-nji aprelde UEFA Çempionlar ligasynyň final duşuşygynyň petekleri satuwa çykaryldy, ol 10-nji iýunda Stambulyň Atatürk adyndaky Olimpiýa stadionynda geçiriler. petekler UEFA-nyň resmi saýty arkaly satylýar, olaryň eýeleri bolsa lotoreýa bilen kesgitlenýär. Çempionlar ligasynyň final duşuşygynyň bir peteginiň bahasy 70-den 690 ýewro çenli aralykdadyr.

10. Futbol boýunça Türkmenistanyň 17 ýaşa çenli zenanlar ýygyndysy 26 – 30-njy aprel aralygynda Singapurda geçirilýän Aziýanyň Kubogy – 2024 ýaryşynyň saýlama ýaryşyna gatnaşýar. Sişenbe güni futbolçy gyzlar we Kamil Mingazowyň ýolbaşçylygyndaky milli ýygyndynyň tälimçiler düzümi Aşgabadyň Halkara howa menzilinden üstaşyr howa gatnawy bilen Singapura uçdular. Türkmenistanyň milli ýygyndysy «D» toparçada çykyş eder. Şu gün türkmen zenan futbolçylary Bangladeşiň topary bilen oýnar, 28-nji aprelde bolsa – Singapuryň ýygyndysy bilen duşuşar.

Teswirler
Teswir ýazmak üçin içeri giriň ýa-da registrasiýa boluň