Türkmenistanda nagt däl hasaplaşyklaryň möçberi artdy, Belarusyň ilçisi Aşgabatdaky wezipesini tamamlady, Türkmenistanda täze suw arassalaýjy desga ulanmaga berildi we beýleki habarlar
Türkmenistanda
1. Türkmenistanda nagt däl hasaplaşyklaryň möçberi 2024-nji ýylyň ýanwar — noýabr aýlarynda 18,3 million manatdan geçdi. Munuň özi, 2023-nji ýylyň degişli döwri bilen deňeşdirilende, 17 göterim köpdür. Nagt däl hasaplaşyklaryň artmagyna döwrebap sanly hyzmatlaryň, şol sanda mobil we internet bank ulgamlarynyň ornaşdyrylmagy ýardam berýär. Täze hyzmatlaryň hatarynda «Menzilara bank» uzak aralykdan bank ulgamy hem bar, 2024-nji ýylyň 1-nji dekabry ýagdaýyna görä, 24,1 müňden gowrak müşderi halkara hasaplaşyk kartlary bilen amallary ýerine ýetirmek üçin bu hyzmatdan peýdalandy. Şeýle hem ýurtda «VISA» we «MasterCard» halkara töleg ulgamlary işjeň ösdürilýär, galtaşyksyz töleg tehnologiýalary we maliýe amallary üçin täze ykjam goşundylar ornaşdyrylýar.
2. Türkmenistanyň Mary welaýatynda bir gije-gündizde 25 000 kub metr agyz suwuny öndürmäge ukyply döwrebap suw arassalaýjy desga ulanmaga berildi. Täze desga «Bakу çynar» hojalyk jemgyýeti tarapyndan Türkmengala etrabynyň Seýitnazar Seýdi adyndaky geňeşligiň çäginde guruldy.
3. Belarus Respublikasynyň Türkmenistandaky ilçisi Wýaçeslaw Beskostyý ýurtdaky wezipesini tamamlaýar. Şu mynasybetli Türkmenistanyň DIM-nde daşary işler ministriniň orunbasary Ahmet Gurbanow bilen duşuşyk geçirildi. Taraplar Türkmenistan bilen Belarus Respublikasynyň arasyndaky däp bolan dostlukly gatnaşyklaryň ýokary derejesini bellediler.
4. Aşgabatdaky Gyşky oýunlar sport toplumynda russiýaly aýdymçy Olga Şultaýsyň hem-de özbegistanly estrada ýyldyzy Osman Nowruzowyň türkmen aýdymçylary bilen bilelikdäki konserti boldy.
5. Hindistanyň Türkmenistandaky ilçihanasy Türkmenbaşy şäherinde meşhur aktýor we režissýor Raj Kapuryň 100 ýyllyk ýubileýi mynasybetli «Indian Film Festival 2024» atly kinofestiwaly gurady. Festiwalyň açylyş dabarasyna Türkmenbaşy şäheriniň häkiminiň orunbasary Maýsa Guljanowa hem-de Hindistanyň ilçisi Madhumita Hazarika Bhagat gatnaşdy.
6. Bilelikdäki türkmen-rus orta mekdebiniň okuwçylary maýyp çagalar üçin Täze ýyl dabarasyny gurap, däp bolan «Ýagşylyk et» atly haýyr-sahawat çäresini geçirdiler.
Dünýäde
7. Häzirki wagtda bütin dünýädäki katolikler Roždestwo baýramyny belleýärler. Ýewropanyň şäherlerinde eýýäm baýramçylyk ýagdaýy höküm sürýär. Roždestwo bazarlary Roždestwonyň öňüsyrasyndaky günleriň aýrylmaz bölegine öwrüldi. Şeýlelikde, «Roždestwonyň paýtagty» diýlip atlandyrylýan Strasburgda «Geň galmaly wagt» şygary bilen ýarmarka açyldy. Onuň esasy özüne çekiji nyşany 31 metrlik arçadyr. Şäheri bezemek üçin energiýa tygşytlaýan lampalaryň ulanylýandygy bellärliklidir.
8. Azerbaýjanyň «Azerbaijan Airlines» awiakompaniýasynyň Bakudan Grozny şäherine uçýan ýolagçy uçary çarşenbe güni Gazagystanyň Aktau şäheriniň golaýynda heläkçilige uçrady. Iň soňky maglumatlara görä, uçarda 69 adam bardy. Olaryň köpüsi Azerbaýjanyň raýatlary, şeýle hem Russiýanyň, Gazagystanyň we Gyrgyzystanyň raýatlary bardy. Halas edijiler we derňew guramalary häzirki wagtda betbagtçylyk bolan ýerde iş alyp barýarlar.
Sport täzelikleri
9. Türkmenistanly agyr atletikaçy Şahzadbek Mätýakubow Doha şäherinde ýetginjekleriň arasynda geçirilen Aziýanyň çempionatynda altyn medal gazanyp, dünýä rekordyny goýdy. Mätýakubow 102 kg agram derejesinde çykyş edip, ýeňiji boldy. Ol itekläp galdyrmakda we iki ýaryşyň jemindäki netijesi boýunça ýetginjekleriň arasynda dünýä rekordlaryny goýdy.
10. Gülälek Kakamyradowa hem ýetginjekleriň arasynda Aziýanyň çempionatynda 64 kg agram derejesinde ýeňiş gazanyp, Türkmenistanyň milli ýygyndysyna ýene bir altyn medal getirdi. Türkmenistanly türgen silterläp götermekde 92 kg, itekläp götermekde bolsa 110 kg agramy göterip, jemi 202 kg netije görkezmegi başardy.
11. Türkmen figuralaýyn typyjylary Daşkende geçirilen «Global Skating Academy Trophy» atly halkara ýaryşynda iki kümüş we bir bürünç medal gazandylar. Bäsleşige dürli ýurtlardan 220-den gowrak türgen gatnaşdy. Türkmen toparynyň düzüminde Aýnur Berdiýewa we Rahman Hojamgulyýew kümüş medallara eýe boldular. Bürünç medala Hanna Sahedowa mynasyp boldy.
