Gurbanguly Berdimuhamedow «Türkmenistan – ABŞ» işewürler geňeşiniň Ýerine ýetiriji direktory bilen hyzmatdaşlygyň geljegini ara alyp maslahatlaşdy, «Türkmenistan» awiakompaniýasy halkara uçuşlaryň geografiýasyny giňeldýär, Russiýa türkmen harytlarynyň importyny artdyrmaga gyzyklanma bildirýär we beýleki habarlar
1. Тürkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Türkmenistan – ABŞ» işewürler geňeşiniň Ýerine ýetiriji direktory Erik Stýuart bilen duşuşdy. Duşuşygyň dowamynda söwda, ykdysadyýet, energetika, oba hojalygy we ulag ulgamlarynda ikitaraplaýyn hyzmatdaşlygyň esasy ugurlary ara alnyp maslahatlaşyldy.
2. «Türkmenistan» awiakompaniýasy Aşgabat – Deli we Aşgabat – Jidda ugurlary boýunça uçuşlarynyň sanyny köpeldýär. Aşgabat – Deli – Aşgabat ugry boýunça goşmaça uçuşlar 22-nji dekabr, 29-njy dekabr, 4-nji ýanwar, 11-nji ýanwar we 18-nji ýanwar günlerine meýilleşdirilýär. Aşgabat – Jidda – Aşgabat ugry boýunça goşmaça uçuşlar bolsa 24-nji dekabr, 4-nji fewral we 11-nji fewral günleri amala aşyrlar. Häzirki wagtda awiakompaniýa Deli we Jidda şäherlerine hepdede iki gezek yzygiderli uçuşlary amala aşyrýar. Ähli içerki we halkara uçuşlaryna biletleri turkmenistanairlines.tm saýtynda onlaýn görnüşde satyn almak üçin elýeterlidir.
3. Russiýa Türkmenistandan ýokary hilli harytlaryň, şol sanda dokma önümleriniň, oba hojalyk harytlarynyň we dökünleriň importyny artdyrmaga gyzyklanma bildirýär. Bu barada Russiýa Federasiýasynyň Aşgabatdaky ilçisi Iwan Wolynkin metbugat maslahatynda habar berdi. Diplomat bu harytlaryň Russiýa eksportynyň artdyrylmagynyň ikitaraplaýyn gatnaşyklary pugtalandyrjakdygyny aýtdy.
4. 23 – 28-nji dekabr aralygynda Gyşky oýunlar sport toplumynda türkmen we daşary ýurt estrada ýyldyzlaryny bir ýere jemlejek giň gerimli konsertler geçiriler. Aşgabadyň ýaşaýjylaryna we myhmanlaryna dürli ýurtlaryň meşhur artsitleriniň çykyşlary bilen ýatdan çykmajak aýdym-saz hepdesi garaşýar. Her gün tanymal türkmen aýdymçylarynyň we halkara ýyldyzlarynyň gatnaşmagynda özboluşly aýdym-saz maksatnamasy guralar. Ähli konsertler Gyşky oýunlar sport toplumynda sagat 18:00-da geçiriler. Petekleri toplumyň kassasynda satyn almak mümkindir.
5. Türkmenistanyň we Eýran Yslam Respublikasynyň çagalarynyň Dostluk hepdeliginiň açylyş dabarasy Türkmen döwlet gurjak teatrynda geçirildi. Çärelere Eýranyň ilçisi Ali Mojtaba Ruzbehani gatnaşdy. Diplomat umumy gymmatlyklar we däp-dessurlar birleşdirýän iki ýurduň arasyndaky medeni gatnaşyklary pugtalandyrmagyň möhümdigini aýtdy.
Dünýäde
7. Finlýandiýa dünýäde ilkinji bolup milli ses landşaftyny döretdi. Saz kompozisiýasy özboluşly audio syýahatydyr, onda tebigatyň sesleri saz gurallarynyň sazy bilen birleşýär. Ses ýazgysy fin tebigatynyň seslerini – otlaryň şygyrdysyny, tokaýyň dem alşyny we täsin tebigy sesleri öz içine alýar. Bu tebigy ses elementleri nusgawy we halk saz gurallary bilen sazlaşykly utgaşdyrylýar.
8. «Niderlandlaryň gözeli» bäsleşigini guraýjylar tarapyndan möhüm karar kabul edildi – 35 ýyl hereket etmeginden soň, bu çäre adaty formatda işini bes edýär. Düýpgöter üýtgeşmeleriň sebäbi aýal-gyzlara diňe daşarky keşbi boýunça baha bermek ýaly köne çemeleşmeleriň täzeden gözden geçirilmegi bilen baglanyşyklydyr. Adaty gözellik bäsleşigi ýaş aýal-gyzlary goldamaga we hemmetaraplaýyn ösdürmäge gönükdirilen häzirki zaman onlaýn platformasy bilen çalşyrylar. Täze taslama özüňi kämilleşdirmegiň, psihologiki abadançylygyň we jemgyýetçilik işjeňliginiň möhüm mowzuklaryna gönükdiriler.
Sport täzelikleri
9. Madridiň «Realynyň» braziliýaly hüjümçisi Winisius Halkara futbol federasiýasy tarapyndan 2024-nji ýylyň iň gowy oýunçysy diýlip ykrar edildi. Oktýabr aýynda Winisius «France Football» tarapyndan gowşurylýan «Altyn top» baýragyna ses berişlikde ikinji orny eýeledi. Şonda Angliýanyň «Mançester Siti» toparynyň ispan ýarym goragçysy Rodri baýragyň eýesi boldy. 2023/24-nji möwsümde Winisius «Realyň» düzüminde Ispaniýanyň çempiony boldy. Şeýle hem ispan kluby Çempionlar ligasynda we UEFA-nyň Superkubogynda ýeňiji boldy. Tomusda geçirilen Amerikanyň Kubogynda Winisius bilen Braziliýanyň milli ýygyndysy çärýek final tapgyrynda Urugwaýyň toparyndan ýeňilip, ýarym finala çykyp bilmedi.
