Türkmenistanyň Prezidenti ýurduň Eýrandaky täze ilçisini wezipä belledi, «Galkynyş» gaz käninden tebigy gazyň täze senagat akymy alyndy, Türkmenistan «Russiýanyň ulaglary» atly halkara foruma gatnaşdy we beýleki habarlar
Türkmenistanda
1. Ylýas Gaýypow Türkmenistanyň Eýrandaky ilçisi wezipesine bellenildi. Bu babatda degişli Permana Türkmenistanyň Prezidenti Serdar Berdimuhamedow gol çekdi.
2. «Galkynyş» gaz käninde tebigy gaz öndürmekde uly üstünlik gazanyldy. 265 belgili ulanyş guýusynda birnäçe çuňluklardan tebigy gazyň täze akymy alnyp başlandy. Guýynyň bir gije-gündiziň dowamynda akym tizligi artmak meýli bilen 2 million kub metr gazdyr.
3. Türkmenistan Moskwada geçirilen «Russiýanyň ulaglary» atly halkara ulag forumyna we sergisine gatnaşdy. Forumyň çäklerinde 300-den gowrak bilermeniň gatnaşmagynda 30-dan gowrak iş çäreleri guraldy. Duşyşyklarda halkara ulag geçelgelerini ösdürmäge we durnukly üpjünçilik zynjyrlaryny döretmäge aýratyn üns berildi.
4. ÝUNESKO-nyň işleri barada Türkmenistanyň milli toparynyň jogapkär sekretary Çynar Rüstemowanyň ýolbaşçylygyndaky türkmen wekiliýeti Polşanyň Poznan şäherine gulluk iş saparynda bolýar. Saparyň maksady Poznan şäheriniň Kommunikasiýalar we menejment uniwersiteti tarapyndan guralan «Beýik türkmen şahyry Magtymguly Pyragynyň edebi we filosofik mirasy Aziýanyň we Ýewropanyň sebitleriniň arasyndaky medeni köpri hökmünde» atly halkara maslahata gatnaşmakdan ybaratdyr.
5. Magtymguly adyndaky Türkmen döwlet uniwersitetinde ýokary okuw mekdepleriniň talyplarynyň arasynda himiýa dersi boýunça III halkara olimpiadasy badalga aldy. Olimpiada 13 ýurduň wekillerini, şol sanda dünýäniň öňdebaryjy uniwersitetleriniň 200-den gowrak talybyny we mugallymyny bir ýere jemledi. Gatnaşyjylar çylşyrymly nazary we amaly meseleleri çözmekde bäsleşerler, ýeňijilere diplomlar we ýadygärlik sowgatlar gowşurylar.
6. «Alba» döredijilik topary Aşgabadyň ýaşaýjylaryny we myhmanlaryny «Arap gijesi» atly şüweleňli tomaşa arkaly gündogar ertekileriniň jadyly dünýäsine aralaşmaga çagyrýar. Çykyşlar 2 – 6-njy dekabr aralygynda «Gül Zaman» toý zalynda görkeziler. Tomaşaçylara janly simfoniki orkestr, professional hor topary we zehinli tansçylar bilen bilelikde Aladdin hakyndaky rowaýaty janlandyrjak ajaýyp sahna oýny garaşýar.
7. Ýaş suratkeşleriň halkara bäsleşiginiň jemi boýunça neşir edilen «Ýaş suratkeşleriň gözünde Türkmenistan we türki dünýäsi» atly täze katalog-albom çykdy. Bäsleşik Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmeginiň çäklerinde geçirildi. Katalogda Azerbaýjandan, Gazagystandan, Gyrgyzystandan, Türkmenistandan, Türkiýeden we Özbegistandan ýaş zehinleriň eserleri ýerleşdirildi.
Dünýäde
8. Almaty şäherinde «Ýewraziýa» halkara kinofestiwaly öz işine başlady, oňa on bäş ýurtdan kino pudagynyň wekilleri gatnaşýar. Noýabr aýynyň ahyryna çenli meýilleşdirilýän festiwalyň maksatnamasy iki esasy ugur boýunça dowam eder. Halkara bäsleşigiň çäklerinde tomaşaçylar on iki filme tomaşa ederler, Merkezi Aziýanyň we türki dünýäsiniň kinematografiýasyna bagyşlanan ýörite bölümde bolsa dokuz film görkeziler.
9. «Bert» diýlip atlandyrylan güýçli tupan Beýik Britaniýada üç adamyň ölmegine we infrastrukturanyň işinde giň gerimli zeperlenmä sebäp boldy. Ýurduň meteorologiýa gullugy döwletiň tutuş çäginde «mämişi» howp derejesini yglan etdi. Güýçli ýeller bilen bilelikde diňmän ýagýan ýagyş we gar 24 sagatdan gowrak wagt bäri dowam edýär. Ýagdaýyň çynlakaýdygyna garamazdan, günorta sebitlerde ýaşaýan käbir britanlar bolup geçýän zatlary parahat kabul edip, ony tebigatyň adaty hadysasy diýip hasaplaýarlar. Iň kyn ýagdaý Şotlandiýada ýüze çykdy, bu ýerde takmynan 60 müň hojalyk elektriksiz galdy.
Sport habarlary
10. «Arkadag» toparynyň futbolçylary Türkmenistanyň Ýokary ligasynyň 30-njy tapgyrynyň oýnunda 4:1 hasabynda «Aşgabatdan» üstün çykdylar. Duşuşyk Aşgabatdaky «nusaý» stadionynda geçirildi. «Arkadag» toparynyň düzüminde Şanazar Tirkişow iki gol geçirdi, Didar Durdyýew we Altymyrat Annadurdyýew hersi bir gol geçirdi. «Arkadag» ýaryşyň sanawynda bäşinji orunda barýar, öňräk Wladimir Baýramowyň şägirtleri möhletinden öň Türkmenistanyň çempionatynyň altyn medallaryna mynasyp bolupdylar. «Aşgabat» ýedinji orunda barýar.
