Türkmenistanyň Prezidenti oba hojalyk pudagyny ösdürmegiň meseleleri boýunça iş maslahatyny geçirdi, Türkmenistanyň Daşary işler ministrliginde Belarus Respublikasynyň täze ilçisi bilen duşuşyk geçirildi, Aşgabatda döwlet ulgamynd emeli aňy ulanmak meselesi ara alnyp maslahatlaşylar we beýleki habarlar
Türkmenistanda
1.Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Iş maslahatynda ýurduň oba hojalyk toplumynda barylýan işler, şeýle hem Oba milli maksatnamasynyň ýerine ýetirilişi bilen baglanyşykly meselelere garaldy.
2. Türkmenistanyň daşary işler ministri Raşid Meredow Belarus Respublikasynyň Türkmenistanda täze bellenilen Adatdan daşary we Doly ygtyýarly ilçisi Stanislaw Çepurnoý bilen duşuşdy. Ilçi özüniň ynanç hatynyň nusgalaryny gowşurdy.
3. Türkmenistanyň Prezidentiniň ýanyndaky Döwlet gullugy akademiýasynda sanly medeniýete we döwlet dolandyryşyny özgertmäge bagyşlanan dört günlük okuw maslahaty öz işine başlady. Bu çäre sanlylaşdyrmak boýunça halkara bilermen, Russiýanyň Halklaryň dostlugy uniwersitetiniň emeli aň fakultetiniň professory Wiktor Dostowyň gatnaşmagynda BMGÖM bilen bilelikdäki taslamanyň çäklerinde geçirilýär.
4. Russiýanyň Türkmenistandaky ilçihanasy ýurduň prawoslaw hristianlaryny Roždestwo baýramy bilen gutlady. esasy hristian baýramlarynyň biri bolan Roždestwonyň gelmegi mynasybetli dini dabaralar Türkmenistanyň ähli 12 prawoslaw ybadathanalarynda bir wagtda geçirildi.
5. Türkmenistan we Hytaý 6-njy ýanwarda diplomatik gatnaşyklaryň ýola goýulmagynyň 33 ýyllygyny bellediler. Bu waka mynasybetli HHR-niň ilçihanasy ikitaraplaýyn hyzmatdaşlygyň mundan beýläk-de pugtalandyryljakdygyna ynam bildirdi.
6. Türkmenistanyň bilim ministrligi daşary ýurt diplomlaryny ykrar etmegiň tertibine düýpli üýtgeşmeler girizdi. Daşary ýurt döwletlerinde hukuk ugry boýunça bilim alan uçurymlar indi 3 aý möhletli tölegli okuw geçmäge borçly edildi. Onuň meýilnamasyny Türkmenistanyň Bilim ministirligi bilen Adalat ministrligi bilelikde tassyklar. Hukuçylaryň synaglary üçin ýörite Döwlet synag topary dörediler
Dünýäde
7. Braziliýaly monah zenan Inah Kanabarro Lukas dünýädäki iň garry adam adynyň täze eýesi boldy. Bu derejäni ol ozalky rekordyň eýesi ýaponiýaly Tomiko Itooka aradan çykandan soň aldy, ol 2024-nji ýylyň dekabr aýynyň ahyrynda 116 ýaşynda aradan çykdy. 2025-nji ýylyň 7-nji ýanwaryna çenli Lukasyň ýaşy 116 ýyl, alty aý 30 gün. Ol diňe bir dünýäniň iň garry zenany däl, eýsem, 1908-nji ýylda doglan ýeke-täk diri adamdyr.
Sport täzelikleri
8. Türkmenistan milli ýygyndysynyň ozalky derwezebany, Russiýanyň milli ýygyndysynda we «Rostowda» Waleriý Karpiniň häzirki kömekçisi Witaliý Kafanow «Matç TW» teleýaýlymyna beren interwýusynda oýun karýerasy baradaky ýatlamalaryny paýlaşdy. Onuň bellemegine görä, ol örän giç – 15 ýaşynda futbol oýnap başlapdyr we ilkinji resmi duşuşygyna diňe 23 ýaşynda çykypdyr. Kafanowyň iki ýurduň milli ýygyndylarynda oýnandygy bellärliklidir. Ol 32 ýaşynda Gazagystanyň milli ýygyndysynda çykyş edip başlady, soňra bolsa Türkmenistanyň milli ýygyndysynda oýnady we ýygyndynyň düzüminde birnäçe oýunlarda, şol sanda Eýran bilen ýoldaşlyk duşuşyklarynda we Aziýa çempionatynyň saýlama tapgyrynda Liwana garşy resmi oýunlarda çykyş etdi.
9. «Milanyň» futbolçylary baýrak ugrundaky oýunda «Interden» 3:2 hasabynda üstün çykyp, Italiýanyň Superkubogyny eýelediler. Duşuşyk Saud Arabystanynyň Er-Riýad şäherinde geçirildi. «Rossoneri» iki gol yzda barýandygyna garamazdan, ýeňiş gazanmagy başardy we täze baş tälimçi Seržiu Konseýsauwa ilkinji kubogyny getirdi.
