11-nji ýanwarda Türkmenistanyň esasy habarlarynyň daýjesti

Türkmenistanda Arkadag şäheriniň medisina klasteriniň birinji tapgyrynyň gurluşygyna girişiler, Türkmenistan Hytaýyň «Yutong» kysymly 700 awtobusyny satyn alar, türkmen raýatlary bir wiza bilen Russiýa we Belarusa syýahat edip bilerler we beýleki habarlar

Türkmenistanda

1. Türkmenistanda Arkadag şäheriniň medisina klasteriniň birinji tapgyrynyň gurluşygyna girişiler. Degişli Karara Türkmenistanyň Prezidenti Serdar Berdimuhamedow gol çekdi. Resminama laýyklykda, Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetine degişli binalaryň we desgalaryň taslamalaryny düzmek hem-de olary ýanaşyk ýerleri abadanlaşdyryp gurmak barada ýerli we daşary ýurt kärhanalary bilen şertnamalary baglaşmaga ygtyýar berildi. Karara laýyklykda, Gurluşyk işlerine 2025-nji ýylyň ýanwar aýynda başlamak hem-de binalary we desgalary 2027-nji ýylyň ýanwar aýynda ulanmaga doly taýýar edip tabşyrmak bellenildi.

2. Türkmenistanyň Prezidenti Serdar Berdimuhamedowyň gol çeken Kararyna laýyklykda, «Türkmenawtoulaglary» agentligine 700 sany awtobusy satyn almak barada Hytaý Halk Respublikasynyň «Yutong Bus Сo.,Ltd.» kompaniýasy bilen şertnama baglaşmaga ygtyýar berildi.

3. 11-nji ýanwardan başlap, Belarus bilen Russiýanyň arasynda wizalary özara ykrar etmek barada ylalaşyk güýje girýär. Resminama görä, ýurtlaryň birine girmek üçin wiza alan Türkmenistanyň raýatlary wizanyň hereket edýän möhletiniň dowamynda iki döwletiň çäklerinde giriş-çykyş, ýaşamak we üstaşyr geçmek hukugyna eýe bolarlar. Hakykatda bu, Belarus wizasyny alan türkmenistanlynyň goşmaça rugsatnama resmileşdirmezden Russiýa hem baryp biljekdigini aňladýar. Şeýle hem, Russiýa wizasy bilen Belarusa girmek mümkin bolar.

4. Türkmenistanyň Daşary işler ministrligi şu ýyl üçin Iş meýilnamasyny hödürledi. Ol Ýewropa, Orta Gündogar, Ýakyn Gündogar we Afrika, Aziýa — Ýuwaş umman sebiti, Amerika ýurtlary bilen hyzmatdaşlygyny mundan beýläk-de ösdürmek boýunça çäreleri öz içine alýar. Resminamada ikitaraplaýyn saparlary, syýasy geňeşmeleri we duşuşyklary, özara gatnaşyklaryň dürli ugurlary boýunça beýleki çäreler beýan edilýär. Iş meýilnamasy guramaçylyk meselelerine, halkara hyzmatdaşlygyna, hukuk meselelerine we sanly diplomatiýa degişli 10 bapdan ybaratdyr.

5. Türkmenistanyň Döwlet simfoniki orkestri hindi kinofilmlerinden ajaýyp kompozisiýalary ýerine ýetirdi. Bu çäre Hindistanyň ilçihanasynyň we Türkmenistanyň Medeniýet ministrliginiň goldawy bilen Döwlet medeniýet merkeziniň Mukamlar köşgünde geçirildi. Bolliwud Hindistanyň çäklerinden has uzakda meşhur bolan medeni hadysa öwrüldi. Hindi kinosy Türkmenistanyň halkynyň ýüreginde aýratyn orny eýeleýär, oňa bolan söýgi ýigriminji asyryň 50-nji ýyllarynyň ahyrynda başlandy. Aşgabatda geçirilen konsertiň maksatnamasy bu medeni arabaglanyşygyň aýdyň subutnamasy boldy. Oňa dürli döwürleriň hindi filmlerinden 21 saz eseri girizildi.

6. Hytaýyň Türkmenistandaky Ilçihanasy Täze ýyl sebäpli bir hepdelik wiza resmileşdirmek üçin arzalary kabul etmegi togtadýar. HHR-niň diplomatik wekilhanasynyň sosial ulgamlardaky sahypasynda 28-nji ýanwardan 4-nji fewrala çenli dynç alyş barada habar peýda boldy. 2025-nji ýylda Hytaýda Täze ýyl 29-njy ýanwarda belleniler.

7. Russiýanyň «S7» awiakompaniýasy 2025-nji ýylyň 15-nji ýanwaryndan Moskwa – Aşgabat ugry boýunça gündelik uçuşlary ýola goýar. Gündelik howa gatnawyna geçiş tapgyrlaýyn esasda amala aşyrylar. 9-njy ýanwardan başlap, awiakompaniýa bar bolan uçuş meýilnamasyna duşenbe we penşenbe günleri amala aşyryljak goşmaça iki uçuş goşar, bir hepdeden bolsa soň uçuşlar her gün amala aşyrylar.

Dünýäde

8. Meşhur sosial wideoplatformasy «TikTok» 19-njy ýanwardan ABŞ-nyň çäginde işini bes edip biler. Bu çözgüt Ýokary Kazyýetiň hytaý platformasyndan öz işini üçünji tarapa satmagy we «ByteDance» baş kompaniýasy bilen aragatnaşygyny kesmegi talap edýän kanuny kabul eden halatynda güýje girer. Kompaniýa programmany satmak islemeýändigini eýýäm mälim etdi.

9. Beýik Britaniýadan IT hünärmeni Nýuport şäheriniň zibilhanasynda kriptowalýuta saklaýan çeýe diski gözlemek üçin kazyýet tarapyndan rugsat almak babatda şowsuzlyga uçrady. Waka 2013-nji ýylda, 39 ýaşly Jeýms Houellsiň ýakyny bilmän 8000 bitkoin saklaýan çeýe diski zyňanda başlandy. Häzirki wagtda bu sanly maýanyň bahasy takmynan 750 million dollar diýlip çaklanylýar. Diski tapmak üçin takmynan 100,000 tonna galyndylary süpürip, giňişleýin gazuw-agtaryş işleri gerek bolar.

Sport habarlary

10. Türkmenistanyň milli ýygyndysynyň öňki futbolçysy Maksim Belyh Gyrgyzystanyň Premýer-ligasynyň «Ozgon» klubynyň tälimçiler düzümine fiziki taýýarlyk boýunça tälimçi hökmünde goşuldy.

11. Türkmenistanyň Futbol Federasiýasy Germaniýanyň Futbol Bileleşigi bilen hyzmatdaşlygyň mümkinçiliklerini ara alyp maslahatlaşdy. Wideoaragatnaşyk arkalyduşuşykda taraplar ýaş futbolçylary taýýarlamak we tälimçilik bilimini ösdürmek babatda hyzmatdaşlygy ýola goýmak meselelerini ara alyp maslahatlaşdylar. Germaniýanyň bu ugurdaky öňdebaryjy tejribesini Türkmenistanda ornaşdyrmak mümkinçilikleri gözden geçirildi.

12. 11-nji ýanwarda «Türkmenistan Sport» teleýaýlymy Italiýanyň we Germaniýanyň futbol çempionatlaryndan iki oýnuny göni ýaýlymda görkezer. Agşamky ýaýlymlaryň sanawynda – Italiýanyň Seriýa A-syndan «Udineze» bilen «Atalantanyň» arasynda oýun, başlanýan wagty 19:00. Soňra, 22:30-da, Germaniýanyň Bundesligasyndan «Borussiýa Möhnengladbahyň» «Bawariýa» bilen duşuşygy görkeziler.