4-nji ýanwarda Türkmenistanyň esasy habarlarynyň daýjesti

Türkmenistanyň Prezidenti ýurdy ösdürmegiň esasy ugurlaryny kesgitledi, adam söwdasyna garşy göreşmek boýunça bäş ýyllyk meýilnama kabul edildi, 2025-nji ýylda çäreleri ýokary derejeli geçirmek boýunça guramaçylyk topary döredildi we beýleki habarlar

Türkmenistanda

1. Türkmenistanyň Prezidenti Serdar Berdimuhamedow sanly ulgam arkaly Hökümetiň nobatdaky mejlisini geçirdi. Onda ykdysadyýetiň esasy pudaklarynyň 2025-nji ýyl üçin iş meýilnamalary tassyklanyldy.

2. Türkmenistanda adam söwdasyna garşy hereket etmek boýunça 2025 — 2029-njy ýyllar üçin Hereketleriň milli meýilnamasy kabul edildi. Meýilnama bu ugurda halkara hyzmatdaşlygyny giňeltmäge aýratyn ähmiýet berilýär.

3. Türkmenistanyň Prezidentiniň gol çeken degişli Permanyna laýyklykda, 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem-de Türkmenistanyň hemişelik Bitaraplygynyň 30 ýyllygy mynasybetli çäreleri ýokary derejede geçirmek boýunça Guramaçylyk döwlet topary döredildi we onuň düzümi tassyklanyldy.

4. Sankt-Peterburgyň gubernatory Aleksandr Beglow Türkmenistanyň Prezidenti Serdar Berdimuhamedowa Täze ýyl gutlagyny iberdi. Beglow Täze ýylda Sankt-Peterburg bilen Türkmenistanyň netijeli hyzmatdaşlygy has-da pugtalandyrjakdygyna, täze taslamalary durmuşa geçirjekdigine ynam bildirdi.

5. Türkmenistanyň Prezidenti Serdar Berdimuhamedowyň «Magtymguly — dünýäniň akyldary» atly täze kitaby neşir edildi. Neşir üç dilde: türkmen, rus we iňlis dillerinde aýry-aýry kitap görnüşinde çykaryldy. Eserde görnükli şahyryň edebi mirasynyň ähmiýeti, dünýä edebiýatyna goşan ägirt uly goşandy, şahyryň ýubileý toýy bilen bagly geçirilen çäreler giňden beýan edilýär, şeýle hem geçen ýyl Türkmenistanda ýetilen sepgitleriň, gazanylan üstünlikleriň jemi jemlenýär.

Dünýäde

6. Gazagystanyň Akmola sebitinde köpçülikleýin ýol-ulag hadysasy boldy. Biržan Sal etrabynyň Kogam we Karatal obalarynyň arasyndaky ýoluň ugrunda 95 awtoulag çaknyşdy. Etrabyň polisiýa bölüminiň habar bermegine görä, heläkçiligiň sebäbi howa şertleriniň birdenkä ýaramazlaşmagy boldy – gar tupany sebäpli ýolda görüş örän çäklendi.

7. Keniýanyň çägine agramy ýarym tonna barabar uly kosmos jisimi gaçdy. Raketa-göterijiniň bir bölegi bolan ullakan metal halka ýerli obalaryň biriniň golaýynda garaşylmadyk ýere gondy. Nygtamaly tarapy, ýerli ýaşaýjylardan hiç kim ýaralanmady.

Sport täzelikleri

8. Italiýanyň Superkubogynyň ýarym final oýnunda «Milan» «Ýuwentusy» 2:1 hasabynda ýeňdi. Bu ýaryş Saud Arabystanynda geçirilýär. Finalda «Milan» öň «Atalantany» 2:0 hasabynda ýeňen «Inter» bilen duşuşar. Ýeňiş ugrundaky aýgytly oýun 6-njy ýanwarda geçiriler.

9. Madrid «Realy» futbol boýunça Ispaniýa çempionatynyň 12-nji tapgyrynyň yza süýşürilen oýnunda «Walensiýadan» 2:1 hasabynda üstün çykdy. 27-nji minutda Ugo Duronyň goly bilen «Walensiýa» öňe saýlandy. Şeýle-de bolsa, Luka Modriçiň we Jud Bellingemiň goly bilen «Real» oýnuň gidişini üýtgetmegi başardy. Bu ýeňiş «Reala» 43 utuk toplap, sanawda birinji orna çykmaga mümkinçilik berdi.