Girmek
Türkmenistanyň Katar Döwletindäki ilçisi Myratgeldi Seýitmämmedowyň 2025-nji ýylyň Türkmenistanda «Halkara parahatçylyk we ynanyşmak ýyly» diýip yglan edilmegine bagyşlanylan makalasy öňdebaryjy arap neşirleriniň biri bolan «Al Sharq» gazetinde çap edildi.
Diplomat öz makalasynda Türkmenistanyň Birleşen Milletler Guramasy tarapyndan iki gezek ykrar edilen hemişelik Bitaraplyk derejesiniň ähmiýetini nygtaýar. Bitaraplyk hukuk ýagdaýy türkmen halkynyň parahatçylyk söýüjilikli daşary syýasatynyň aýdyň subutnamasydyr.
«BMG-niň Baş Assambleýasy Türkmenistanyň başlangyjy bilen 2025-nji ýyly «Halkara parahatçylyk we ynanyşmak ýyly» diýip yglan etdi. Bu bolsa halkara jemgyýetçiligiň biziň ýurdumyza bolan hormatyny ýene bir gezek görkezdi we Türkmenistanyň halkara hyzmatdaşlygyny pugtalandyrmakda öňdebaryjy döwlet hökmündäki abraýyny artdyrdy» diýlip, makalada bellenilýär.
Ilçiniň öz makalasynda bellemegine görä, geçen ýyl Türkmenistanyň hemişelik Bitaraplygynyň 29 ýyllygy mynasybetli guralan çärelere Katar Döwletiniň Daşary işler ministrliginiň Diplomatiýa institutynyň direktory Abdulaziz ben Mohammed Al-Horr hem gatnaşdy. Munuň özi türkmen-katar gatnaşyklarynyň ösmegi üçin täze gözýetimleriň açylýandygyny görkezýär.