Türkmenistanyň Prezidenti iş maslahatyny geçirdi, Türkmenistan we Saud Arabystany 2025-nji ýylda berjaý ediljek haj zyýaraty bilen baglanyşykly Ylalaşyga gol çekdiler, «Galkynyş» milli at üstündäki oýunlar topary Monakoda geçiriljek 47-nji sirk festiwalynda çykyş eder we beýleki habarlar
Türkmenistanda
1. Prezident Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurduň oba hojalyk toplumynda we sebitlerinde alnyp barylýan işler, Oba milli maksatnamasynyň ýerine ýetirilişi bilen baglanyşykly meselelere garaldy. Döwlet Baştutany oba hojalyk pudagynyň öňünde ilaty ýokary hilli oba hojalyk önümleri bilen, milli senagaty çig mal bilen üpjün etmek ýaly möhüm wezipeleriň durýandygyny belledi.
2. Türkmenistanyň Müftüsiniň müdiriýeti bilen Saud Arabystany Patyşalygynyň Haj we umra ministrliginiň arasynda 2025-nji ýylda berjaý ediljek haj zyýaraty bilen baglanyşykly ikitaraplaýyn Ylalaşyga gol çekildi. Resminama Jidda şäherinde geçirilen «Haj we umra hyzmatlary» atly dördünji maslahatyň we serginiň çäklerinde gol çekildi.
3. Dünýäde meşhurlyk gazanan «Galkynyş» milli at üstündäki oýunlar topary 17 — 26-njy ýanwar aralygynda geçiriljek 47-nji Monte Karlo halkara sirk festiwalynda ahalteke bedewleriniň gatnaşmagynda ajaýyp çykyşlary görkezerler. Monte Karloda geçirilýän halkara sirk festiwaly sirk sungaty dünýäsiniň iň abraýly wakalarynyň biri hasaplanýar. Bu ýyl guramaçylar dünýäniň iň gowy artistleriniň gatnaşmagynda görlüp-eşidilmedik maksatnamany köpçülige hödürläp, birnäçe rekord goýmagy wada berýärler.
4. Türkmenistanyň DIM-de daşary işler ministriniň orunbasary Mähri Bäşimowa bilen Ýewropa Bileleşiginiň Türkmenistandaky ilçisi Beata Peksanyň arasynda duşuşyk geçirildi. Taraplar syýasy, söwda-ykdysady we medeni-ynsanperwer ugurlarda Türkmenistan bilen ÝB-niň arasyndaky özara gatnaşyklaryň möhüm meseleleri barada pikir alyşdylar.
5. Türkmenistanyň Gazagystandaky ilçisi Batyr Rejepow we Niderlandlaryň Astanadaky ilçisi Nikolaas Ýakob Şermers duşuşyk geçirdiler. Duşuşykda iki taraplaýyn hyzmatdaşlygy ösdürmegiň geljegi ara alnyp maslahatlaşyldy. Duşuşygyň dowamynda türkmen tarapy Niderlandlary 2025-nji ýylda Türkmenistanyň Bitaraplygynyň 30 ýyllygyna bagyşlanan çärelere gatnaşmaga çagyrdy. Şeýle hem, BMG-niň meýdançasynda «Parahatçylyk we howpsuzlyk ugrunda Bitaraplaryň dostlary topary» döretmek baradaky Türkmenistanyň başlangyjyny goldamak teklip edildi.
Dünýäde
6. Eýýäm üç ýyl bäri Daniýada ýekeje-de banka edilen hüjüm hasaba alynmady. Analitikleriň pikiriçe, sanly töleglere köpçülikleýin geçiş bank talaňlarynyň sanynyň azalmagynyň esasy sebäbine öwrüldi. Hökümetiň 2015-nji ýylda nagt däl tölegleri ilerletmek boýunça başlangyjy ýurduň maliýe ýagdaýyny düýpgöter üýtgetdi we adaty bank şahamçalaryny jenaýatçylaryň ünsden düşürmegine sebäp boldy. Bu statistikada aýdyň görünýär: eger 2000-nji ýylda ýurtda 221 bank talaňçylygy hasaba alnan bolsa, 2017-nji ýyldan soň şeýle jenaýatlaryň sany çalt azalmaga başlady we 2022-nji ýylda nola ýetdi.
Sport täzelikleri
7. Eýranyň milli ýygyndysynyň we «Şabab Al-Ahli» futbol klubynyň hüjümçisi Sardar Azmun kakasy Halyly 13-nji ýanwarda Eýranda bellenilýän Atalar güni bilen gutlady. Serdar sportda-da, durmuşda-da özüne görelde bolup, durmuşa we adamlara dogry çemeleşmäni öwredendigi üçin kakasyna minnetdarlyk bildirdi. Sardar Azmun Eýranyň Golestan welaýatynyň Gombede-Kawus şäherinde dünýä indi. Bu sebit Türkmenistan bilen serhetde ýerleşýär we onuň ilatynyň aglaba bölegi, türgeniň maşgalasy ýaly, etniki türkmenlerdir.
8. 36 ýaşly britan boksçysy Taýson Fýuri ukrainaly Aleksandr Usikden ýeňilenden soň karýerasyny tamamlajakdygyny mälim etdi. Dekabr aýynda Usik eminleriň biragyzdan karary bilen Fýurini ýeňdi we agyr agram derejesinde dürli boks guramalarynyň dünýä çempiony adyny gorady.
