Türkmenistanyň Mejlisinde Amerikanyň Birleşen Ştatlarynyň Döwlet departamentiniň ýörite geňeşçisi Sara Minkara bilen duşuşyk geçirildi. Bu barada Türkmenistanyň Mejlisiniň resmi saýtynda habar berilýär.
Habarda bellenilişi ýaly, duşuşykda ABŞ-nyň Döwlet departamentiniň wekiliýeti Türkmenistanda durmuş goraglylygy we ilaty durmuş taýdan goramak boýunça amala aşyrylýan çäreler bilen tanyşdyryldy.
Duşuşygyň dowamynda ýurtda çagalara hemaýat bermek boýunça alnyp barylýan meýilnamalaýyn işlere, şeýle hem Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işine aýratyn üns berildi.
Taraplar duşuşygyň ahyrynda ilata edilýän durmuş hyzmatlarynyň hilini ýokarlandyrmak boýunça tejribeleri paýlaşmagyň ähmiýetini bellediler diýlip habarda bellenilýär.
