81-nji gezek geçen Wenesiýa halkara kinofestiwalynyň ýeňijileri yglan edildi. Iň oňat film diýlip ispan kinorežissýory Pedro Almodowaryň «Goňşy otagdakylar» diýen filmi mynasyp görüldi. Bu barada TASS habar berdi.
Filmiň konkurs maksatnamasyna 21 film gatnaşdyryldy. Kinofestiwalyň «Altyn şir» baş baýragyny biri agyr keselli bolan iki sany joranyň durmuşy barada gürrüň berýän film aldy. Onda baş keşpleri Julianna Mur we Tilda Suinton ýerine ýetirdiler. «Goňşy otagdakylar» Almodowaryň iňlis dilindäki ilkinji doly göwrümli filmidir.
Iň oňat aktrisa baýragyna Nikol Kidman «Ýaramaz gyz» filmindäki keşbi üçin mynasyp boldy. Iň oňat erkek keşbi üçin baýraga fransuz aktýory Wensan Kassel eýe boldy.
Kino sungata goşan goşandy üçin baýraklara awstraliýaly režissýor Piter Uir we amerikan aktrisasy Sigurni Uiwer mynasyp görüldi.
Gruziýaly kinorežissýor Dea Kulumbegaşwili «Aprel» atly filmi üçin eminleriň ýörite baýragyny aldy.
