Türkmenistanyň Özbegistandaky täze ilçisi wezipä bellenildi, Türkmenistanyň, Täjigistanyň we Özbegistanyň döwlet Baştutanlarynyň Sammitine taýýarlyk görülýär we beýleki habarlar

Туркменистан

1. Serdar Berdimuhamedow Şadurdy Meredowy Türkmenistanyň Özbegistan Respublikasyndaky ilçisi wezipesine belläp, ony başga işe geçmegi sebäpli, Türkmenistanyň Gyrgyz Respublikasyndaky ilçisi wezipesinden boşatdy.

2. Belgiýanyň «Challenge Airlines» ýük awiakompaniýasynyň ýolbaşçylary Ninbo – Aşgabat we Aşgabat – Lýež ugurlary boýunça Aşgabatdan ýük gatnawlaryny ýola goýmaga gyzyklanma bildirdiler.

3. 23 — 28-nji noýabr aralygynda Aşgabat şäherindäki Olimpiýa şäherçesiniň Başa-baş söweş sungaty sport toplumynda Kuraş boýunça 14-nji dünýä çempionaty geçiriler. Duşenbe güni Türkmenistanyň Prezidenti Serdar Berdimuhamedow degişli Karara gol çekdi.

4. Awgust aýynyň başynda Aşgabatda Türkmenistanyň Prezidenti Serdar Berdimuhamedowyň, Täjigistanyň Prezidenti Emomali Rahmonyň we Özbegistanyň Prezidenti Şawkat Mirziýoýewiň gatnaşmagynda üçtaraplaýyn Sammit geçiriler. Üçtaraplaýyn Sammitiň öňüsyrasynda ýokary derejeli duşuşykda gol çekiljek resminamalaryň üstünde işler alnyp barylýar. Mundan başga-da, daşary syýasat edaralarynyň wekilleriniň, demir ýol işgärleriniň, gümrük gulluklarynyň işgärleriniň arasynda aýratyn duşuşyklar geçirilýär, şeýle hem ykdysady gatnaşyklary ösdürmek, saglygy goraýyş, oba hojalygy, senagat, ylym we bilim pudaklarynyň meseleleri ara alnyp maslahatlaşylýar.

5. Türkmenabat şäherinde Türkmenistanyň Kärdeşler arkalaşyklarynyň Milli merkeziniň yglan eden «Ussat bagban» bäsleşiginiň welaýat tapgyry geçirildi. Oňa welaýatyň etraplaryndan bagbanlaryň 10-dan gowragy gatnaşdy. Saýat etrabynyň «Gülüstan» daýhan birleşiginiň bagbany Sülgün Agamämmedowa birinji orny eýeledi we bäsleşigiň döwlet tapgyryna gatnaşmaga hukuk gazandy. Onuň bagynda 450 düýp erik agajy bar we ol her ýyl 70-den 100 kilograma çenli erik hasylyny alýar.

6. «Älem TV» emeli hemra telewideniýe operatory ulanyjylara 1-nji awgustdan başlap, ýetirilýän teleýaýlymlaryň bukjalarynyň bahasynyň arzanladylýandygyny habar berýär. Indi «Sada»bukjasynyň bahasy aýda 10 manat, «VIP» bukjasynyň bahasy bolsa 25 manat bolar. «Älem TV» hyzmatyny birikdirmek ýa-da ozal saýlanyp alnan nyrh meýilnamasyny üýtgetmek üçin «Türkmentelekom» aragatnaşyk kärhanasynyň bölümlerine ýüz tutup bilersiňiz.

Dünýäde

7. Nebraska uniwersitetiniň alymlary çaga iýmitleri plastik çüýşelerde we gaplarda gyzdyrylanda, iýmite plastigiň milliardlarça nanobölejikleriniň düşýändigini anykladylar. Şeýle netije çaga iýmitleri üçin gaplar bilen geçirilen synaglaryň görkezijileri boýunça ýüze çykaryldy.

8. 95 ýyl ozal «Metro-Goldwyn-Maýer» kinostudiýasynyň mahabat şekilinde (zastawkasynda) ilkinji gezek arlaýan ýolbars peýda boldy. Amerikan kinostudiýasy öz taryhynyň dowamynda mahabat şekilini (zastawkasyny) birnäçe gezek üýtgetdi. 1957-nji ýylda arlaýan janly ýolbars birmeňzeş kompýuterleşdirilen nusga bilen çalşyryldy.

Sport habarlary

9. Global Kibersport federasiýasy 11 – 16-njy dekabr aralygynda Er-Riýadda geçiriljek «Global Esports Games» atly esasy ýaryşy üçin ugurlary yglan etdi. Ýaryş «DOTA 2», «PUBGM», «eFootball 2023» we «Street Fighter 6» boýunça ugurlary öz içine alar. Türkmen kibersport federasiýasy (TMESF) 15 – 20-nji awgust aralygynda milli saýlama oýunlary geçirer. Ýaryşa gatnaşmak üçin oýunçylar azyndan 18 ýaşynda bolmaly. Saýlama oýunlar üçin hasaba alyş işleri federasiýanyň saýtynda elýeterlidir.

10. Aşgabatda türkmen eminleri üçin FIFA-nyň okuw-seminary başlandy we ol 3-nji awgusta çenli dowam eder. Okuw-seminaryny malaýziýaly FIFA derejeli tälimçi alyp barýar. Okuw-seminarynyň dowamynda futbol oýnunyň düzgünleri, eminlik ukyplary boýunça nazary we amaly sapaklar geçiriler, şeýle hem beden taýýarlygy boýunça FIFA-nyň synaglary tabşyrylar.