Türkmenistanyň Prezidenti Pakistanyň ýolbaşçylaryna gynanç bildirdi, Türkmenistanda Hasyl toýy mynasybetli dabaralar geçirildi, ählihalk bag ekmek dabarasynyň çäklerinde Türkmenistanda 500 müňden gowrak nahal oturdyldy we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Pakistan Yslam Respublikasynyň Prezidenti Asif Ali Zardarä hem-de Premýer-ministri Şahbaz Şarife Kwetta şäherindäki demir ýol menzilinde bolup geçen, pajygaly netijelere getiren partlama zerarly gynanç hatyny iberdi. «Türkmenistan terrorçylygyň we ekstremizmiň islendik ýüze çykmalaryny juda aýgytly ýagdaýda ýazgarmak bilen, bu apata garşy göreşmek we ony ýok etmek işinde dünýä bileleşiginiň tagallalaryny doly goldaýar» diýlip, hatda bellenilýär.
2. 10-njy noýabrda Türkmenistanda Hasyl toýy mynasybetli dabaralar geçirildi. Garagum derýasynyň Aşgabat şäheriniň çäginden geçýän böleginiň kenary esasy baýramçylyk çäreleriniň geçirilýän ýerine öwrüldi. Açyk asmanyň astynda oba hojalygynda we gaýtadan işleýän senagatda gazanylan üstünlikler bilen tanyşdyrýan sergi guraldy. Onda amaly-haşam sungatynyň eserleri, her biri türkmen seçgiçi alymlarynyň köpýyllyk zähmetiniň netijesi bolan orta we inçe süýümli pagtanyň iň gowy görnüşleri, türkmen bugdaýynyň naýbaşy görnüşleriniň tohumlary, çörek we çörek önümleri görkezildi.
3. Türkmenistanda ählihalk bag ekmek dabarasy geçirildi, onuň çäklerinde dürli görnüşli agaç nahallarynyň 539 müň 185 düýbi ekildi. Çäre Prezident Serdar Berdimuhamedowyň, şeýle hem Hökümetiň, harby we hukuk goraýjy edaralaryň, diplomatik wekilhanalaryň we halkara guramalaryň wekilleriniň gatnaşmagynda geçirildi. Çäräniň dowamynda ozal ekilen 2 milliondan gowrak baga ideg etmek işleri geçirildi. Prezident Serdar Berdimuhamedow bag nahallarynyň yzygiderli ekilmeginiň ekologik ýagdaýy gowulandyrmakda möhüm ähmiýete eýedigine ünsi çekip, daşky gurşawy goramak boýunça durmuşa geçirilýän işleri hemişe gözegçilikde saklamagy tabşyrdy.
4. Türkmenistanyň ministrlikleriniň we pudaklaýyn dolandyryş edaralarynyň, işewür toparlarynyň hem-de daşary ýurt kompaniýalarynyň wekilleri 14 – 16-njy noýabr aralygynda Aşgabat şäherinde geçiriljek «Turkmentel – 2024» atly halkara sergisine we ylmy maslahatyna gatnaşmaga çagyrylýar. «Türkmenaragatnaşyk» agentligi we Türkmenistanyň Söwda-senagat edarasy tarapyndan guralýan bu çäre telekommunikasiýa, telemetriýa, maglumatlar tehnologiýalary we teleradio enjamlaryna bagyşlanar.
5. Balkan welaýatynyň pagtaçy daýhanlary 16 müň tonnadan gowrak pagta hasylyny ýygnap, pagta taýýarlamak baradaky şertnamalaýyn borçnamasyny möhletinden öň ýerine ýetirdiler. Bu üstünlik obasenagat toplumynyň giň gerimde döwrebaplaşdyrylmagy we oba hojalyk önümçiliginde häzirki zaman tehnologiýalarynyň ornaşdyrylmagy netijesinde gazanyldy.
Dünýäde
6. Azerbaýjanyň paýtagty arassa howany üpjün etmek ugrunda täze ädim ädýär. 1-nji dekabrdan başlap, Bakuwyň köçelerinden tehnologiýanyň iň täze gazananlary bilen enjamlaşdyrylan döwrebap elektrobuslar hereket eder. Olarda ýolagçylar üçin USB zarýad berijileri, sensor düwmeleri göz öňünde tutular, çäkli mümkinçilikleri bolan adamlar üçin bolsa ýörite panduslar üpjün edilýär. Sürüjiler ýol hereketiniň howpsuzlygyny ýokarlandyrmak üçin aýlawly görüş kameralary bilen enjamlaşdyrylan täze ulaglary dolandyrmak boýunça okuwlary geçdiler. Elektrobuslara hyzmat etmek üçin zarýad beriş stansiýalary bolan 210 ulag üçin niýetlenen täze depo guruldy.
7. Tehas ştatynyň ýaşaýjysy Elis Ogletri berlen ene süýdüniň mukdary boýunça dünýä rekordyny goýdy. Onuň ir doglan bäbekleriň janyny halas etmekdäki goşandy Ginnesiň rekordlar kitaby tarapyndan ykrar edildi. 36 ýaşly zenan 2645 litr ene süýdüni bagyş etdi, bu onuň ozalky rekordyndan iki esse köpdür. Elisiň haýyr-sahawat taryhy 2010-njy ýylda, ilkinji gezek ene bolanda başlandy. Şonda ol özünde laktasiýanyň ýokarydygyna göz ýetirdi, bu ondan soňky göwrelilik döwründe hem dowam etdi.
Sport täzelikleri
8. Şu gün Türkmenistanda tennis boýunça «Ashgabat Open 2024» atly halkara ýaryş başlanýar. Prezident Serdar Berdimuhamedow bu sport ýaryşyna gatnaşyjylara Gutlag iberdi. Döwlet Baştutany öz Gutlagynda bu ýaryşyň Türkmenistanyň sport taryhynda möhüm waka boljakdygyny we ýurtda tennisiň ösdürilmegine uly itergi berjekdigini nygtady.
9. Türkmenistanyň Içeri işler ministrliginiň «Köpetdag» topary jemleýji 20-nji tapgyrda «Senagatbankdan» 6:2 hasabynda üstün çykyp, futzal boýunça Türkmenistanyň Naýbaşy ligasynyň 2024-nji ýyldaky altyn medallaryna mynasyp boldy. Kümüş medallara «Senagatbank» topary mynasyp boldy, «Deňizçi» toparynyň futzalçylary bürünç medallary eýelediler. Baýrak gowşurylyş dabarasynda möwsümiň iň gowy oýunçylary sylaglandy. Ýeňijilere we baýrakly orunlara mynasyp bolanlara sylaglary Türkmenistanyň Futbol federasiýasynyň başlygy Guwançmuhammet Öwekow gowşurdy.
