1. Tomus paslynda üç aýyň dowamynda Türkmenistandaky deňiz syýahatçylyk zolagy «Awazada» 150 müňden gowrak adam dynç aldy. Soňky ýyllarda syýahatçylyk zolagynyň keşbi tanalmaz derejede özgerdi. Bu ýerde kaşaň myhmanhanalar, bejeriş merkezleri we beýleki saglygy goraýyş desgalary guruldy.
3. Türkmenistanyň paýtagtynyň Görogly köçesiniň we Saparmyrat Türkmenbaşy şaýolunyň çatrygynda ýol-gurluşyk işleri alnyp barylýar. Şonuň bilen baglylykda, şäheriçi jemgyýetçilik ulaglarynyň gatnaw ugurlary wagtlaýyn üýtgedildi. Şäheriň içinde awtobus arkaly hereket boýunça ugur saýlamak üçin «Duralga» onlaýn-platformasy kömek eder.
4. Ysraýylyň Türkmenistandaky ilçihanasy «Ysraýyl bilen taýýarlaýarys» atly nahar taýýarlamak boýunça bäsleşigiň başlanandygyny yglan edýär. Bäsleşigiň şertleri esasynda ilçihananyň sosial ulgamdaky sahypasyna ýazylmaly, bir jöhit (ýewreý) tagamyny taýýarlamaly we onuň taýýarlanyş usulynyň wideosyny bäsleşigi guraýjylara ibermeli. Bäsleşik 8-nji sentýabra çenli dowam eder, ýeňiji wideosy iň köp goldaw (laýk) alan gatnaşyjylaryň arasyndan saýlanar.
5. 3-nji sentýabrda Türkmenistanda zehinli çagalaryň arasynda geçirilýän «Garaşsyzlygyň merjen däneleri» atly bäsleşiginiň jemleýji tapgyrynyň dabara konserti geçiriler. Ýurdumyzyň ähli sebitlerinde saýlama tapgyrlar geçirildi, olaryň netijeleri boýunça jemleýji tapgyra 18 sany aýdymçy we 13 sany çagalar tans, aýdym-saz we folklor toparlary çykdylar.
6. Aşgabatda «Ýaňlan, Diýarym!» telebäsleşiginiň jemleýji tapgyry geçirildi. Ahyrky tapgyra we dabara konsertine 12 sany ýaş aýdymçy – 8 sany ýaş ýigit we 4 sany gyz gatnaşdy. Şeýlelikde, tomaşaçylaryň gyzgyn elçarpyşmalary astynda emin agzalary 6 sany ýeňijiniň adyny yglan etd. Olar Türkmenistanyň Prezidentiniň adyndan ýörite diplomlar we altyn zynjyr bilen sylaglandylar.
7. Ýaponiýada dünýäniň iň iri feýerwerk festiwallarynyň biri geçirildi. Festiwalyň myhmanlary dürli şekillerdäki adaty feýerwerkleri synladylar, iri kalibrli pirotehniki snarýadlaryň asmanda äpet reňkli şarlara öwrülmeklerinden soňra ýaňlanýan ýüzlerçe gümmürdileri diňlediler.
8. Şu ýyl Ýaponiýada yssy howa gözegçilik taryhynyň dowamynda iň uzagy boldy. Tomusky jöwzany haýwanlar adamlara görä has agyr geçirýärler. Öý haýwanlarynyň yssy howany ýeňil geçirmekleri üçin Tokioda adaty bolmadyk howalandyryjy geýim döredildi. Dört aýaklylar üçin tor şekilli geýimiň ýokarsyna 80 gramlyk wentilýator berkidilýär we ol haýwanlaryň bedenini ýelpäp durýar. Şeýle geýimiň bahasy 74 dollardan başlanýar.
9. Futbol boýunça Türkmenistanyň çempionatynyň 6-njy tapgyrynyň netijeleri boýunça «Ahal» bäsleşigiň sanawynda öňdeligini saklaýar. Ahal welaýatynyň topary 16 utuk gazandy. «Altyn asyr» 12 utuk bilen ikinji orunda barýar. «Şagadam» bolsa 11 utuk bilen üçünji orny eýeleýär.
