Türkmenistanyň Prezidenti we Russiýa Federasiýasynyň wise-premýeri ykdysady hyzmatdaşlygy giňeltmek barada pikir alyşdylar, Özbegistan we Türkmenistan milli ýük daşaýjylar üçin amatly şertleri dörederler, Türkmenistanyň wekiliýeti Wenada ÝHHG-niň mejlisine gatnaşdy we beýleki habarlar
Türkmenistanda
1. Prezident Serdar Berdimuhamedow Ykdysady hyzmatdaşlyk boýunça hökümetara türkmen-rus toparynyň mejlisine gatnaşmak üçin Aşgabada resmi sapar bilen gelen Russiýa Federasiýasynyň wise-premýeri Alekseý Owerçuk bilen duşuşyk geçirdi. Duşuşygyň barşynda ikitaraplaýyn hyzmatdaşlygyň ileri tutulýan ugurlary boýunça gyzyklanma bildirilip pikir alşyldy.
2. Buhara şäherinde Türkmenistanyň we Özbegistanyň ulag-logistika ulgamlarynyň wekililleriniň gatnaşmagynda iş duşuşygy geçirildi. Onuň dowamynda milli ýük daşaýjylar üçin amatly şertleri döretmek barada ylalaşyk gazanyldy. Şeýle hem iki ýurduň arasyndaky resminamalaşdyrmak işini ýönekeýleşdirmek üçin «E-rugsat» elektron alyş-çalyş ulgamyny ornaşdyrmak barada ylalaşyk gazanyldy.
3. Türkmenistanyň wekiliýeti Ykdysady we daşky gurşaw ölçegleri boýunça borçnamalaryň ýerine ýetirilişine syn bermek üçin ÝHHG-niň mejlisine gatnaşdy. Esasy çekişmeler suw serişdeleriniň durnukly ulanylmagyna we sebitdäki durnuklylyga gönükdirildi, şunda tehnologik çözgütlere aýratyn üns çekildi.
4. Ýaponiýanyň Premýer-ministri Sigeru Isiba Osakada geçiriljek «EKSPO — 2025» Bütindünýä sergisiniň çäklerinde Türkmenistanyň Prezidenti Serdar Berdimuhamedow bilen duşuşmagy meýilleşdirýändigini mälim etdi. Isiba türkmen döwletiniň Baştutanyna iberen hatynda iki ýurduň arasyndaky strategiki hyzmatdaşlygyň pugtalandyryljakdygyna ynam bildirdi.
5. 2024-nji ýylyň ilkinji 7 aýynda Türkmenistan bilen Russiýanyň arasyndaky özara söwdanyň mukdary geçen ýylyň degişli döwri bilen deňeşdirilende, 58% ýokarlandy. Bu barada Russiýa Federasiýasynyň wise-premýeri Alekseý Owerçuk mälim etdi. Onuň bellemegine görä, iki ýurduň arasyndaky söwda dolanyşygy oňyn ösüşe eýe, bu bolsa ykdysady gatnaşyklaryň we özara bähbitli hyzmatdaşlygyň pugtalandyrylýandygyny subut edýär. Şeýle hem Owerçuk mundan beýläk-de ösüş üçin Russiýanyň we Türkmenistanyň Hökümetleriniň arasynda 2025 – 2027-nji ýyllar üçin ykdysady hyzmatdaşlygyň meýilnamasynyň işlenip düzülendigini we onuň ylalaşygyň ahyrky tapgyrynda durandygyny aýtdy.
6. Döwletmämmet Azady adyndaky Türkmen milli dünýä dilleri institutynda orta we ýokary okuw mekdepleriniň mugallymlary üçin fransuz dilini öwretmegiň usullary boýunça okuw maslahatlary tamamlady. Ýurduň ýokary dil mekdebi tarapyndan guralan bu okuw maslahatlary hytaý, iňlis we rus dillerini hem öz içine alýan meýilnamalaşdyrylan okuw maksatnamalarynyň çäklerinde geçirildi.
Dünýäde
7. Astanada üç müňden gowrak sazanda bir wagtyň özünde «Balbyrauyn» saz eserini ýerine ýetirip, milli rekordy goýdular. Bu üstünlik Gazagystanyň Ginnesiň rekordlar kitabynda resmi taýdan hasaba alyndy. Giň gerimli çäre «Qazaqstan» sport toplumynda geçirildi we oňa paýtagtyň dombra gurnaklarynyň agzalary gatnaşdylar.
8. ABŞ-da 12 ýaşly oglanjyk diňe tiz tagam (fastfud) bilen iýmitlenýändigi sebäpli görmek ukybyny ýitirdi. Lukmançylyk barlagy çaganyň bedeninde witaminleriň çynlakaý ýetmezçiliginiň görüş nerwiniň atrofiýasyna sebäp bolandygyny görkezdi. Autizmden ejir çekýän ýetginjegiň käbir iýmit düzüminden örän gorkýandygy ýagdaýy has-da çylşyrymlaşdyrdy. Netijede, onuň iýmiti diňe burgerlerden, fri usulynda taýýarlanan ýeralmadan, ponçiklerden we gaplanan miwe şirelerinden ybaratdy.
Sport täzelikleri
9. Merkezi Aziýa Futbol Assosiasiýasy yzly-yzyna ikinji ýyl Aziýada ýylyň iň gowy sebit Assosiasiýasy diýlip ykrar edildi. Baýrak gowşuryş Seuldaky ýyllyk gala dabarasynda geçirildi. Bu guramanyň düzümine alty ýurduň: Türkmenistanyň, Owganystanyň, Eýranyň, Gyrgyzystanyň, Täjigistanyň we Özbegistanyň futbol federasiýalary girýär. Assosiasiýanyň ştab-kwartirasy Duşenbe şäherinde ýerleşýär.
