4-nji noýabrda Koreýa Respublikasynyň daşary işler ministri Ço Tae Ýuluň başlyklyk etmeginde «Merkezi Aziýa — Koreýa Respublikasy» 17-nji hyzmatdaşlyk forumy geçirildi. Oňa Gazagystanyň, Gyrgyzystanyň, Täjigistanyň, Türkmenistanyň we Özbegistanyň wekiliýetleri gatnaşdylar. Forumda Türkmenistana ýurduň Koreýa Respublikasyndaky ilçisi B.Durdyýew wekilçilik etdi.
Forumyň dowamynda gatnaşyjylar şu ýylyň güýzünde Seulda geçirilmegi meýilleşdirilýän 17-nji hyzmatdaşlyk forumy hem-de 2025-nji ýylda ýokary derejede geçirilmegine garaşylýan «Merkezi Aziýa — Koreýa Respublikasy» sammiti bilen baglanyşykly guramaçylyk meselelerini ara alyp maslahatlaşdylar.
Türkmen ilçisi B.Durdyýew öz çykyşynda özara bähbitli hyzmatdaşlygyň möhüm ähmiýete eýedigini belledi. Şunuň bilen baglylykda, «Merkezi Aziýa — Koreýa Respublikasy» formatyndaky hyzmatdaşlyga gatnaşyjy taraplaryň ähli geljegi uly ugurlarda tagallalary birleşdirmeginiň möhümdigi nygtaldy.
Forumyň jemleri boýunça daşary işler ministrleriniň Bilelikdäki Beýannamasyna hem-de «Merkezi Aziýa — Koreýa Respublikasy» hyzmatdaşlyk forumynyň Kätipliginiň Iş meýilnamasyna gol çekildi.
Forumyň çäklerinde daşary syýasat edaralaryň wekilleri Koreýa Respublikasynyň Prezidenti bilen hem duşuşdylar.
