2024-nji ýylyň geçen ýedi aýynda Türkmenistanyň uglewodorod çig mallaryna baý ýataklaryndan alnan «gara altynyň» umumy möçberi 2 million 160 müň tonna golaýlady. Munuň özi «Türkmennebit» döwlet konserniniň degişli müdirlikleri tarapyndan gürrüňi edilýän hasabat döwründe hereket edýän guýulardan nebit çykarmak baradaky meýilnamanyň 102 göterimden geçirilip ýerine ýetirilendiginden habar berýär. Bu barada «Türkmenistan» gazetinde habar berildi.
Şunda meýilnama goşmaça çykarylan «gara altynyň» möçberiniň 55 müň 749 tonnadan hem köp bolandygy aýratyn bellenilmäge mynasypdyr.
Habarda bellenilişi ýaly, gazanylan üstünlikde ýurduň ýangyç-energetika toplumynyň iň iri önümçilik düzümi bolan «Türkmennebit» döwlet konserniniň buraw işleri müdirlikleriniň hem mynasyp paýy bar. Konserniň burawlaýjylary gürrüňi edilýän ýanwar — iýul aýlarynda dag jynslarynyň jemi 99 müň 663 metre barabar çuňluklaryny geçip, bellenilen tabşyryga 3 müň 163 metr artygy bilen hötde gelmegi başardylar. Şeýle hem olar hasabat döwründe ulanyş maksatly täze guýularyň 18 sanysyny uglewodorod çig mallaryny çykaryjy müdirliklere tabşyrdylar. Häzirki wagtda ol guýulardan her gije-gündiziň dowamynda ýüzlerçe tonna «gara altyn» alynýar.
Bu gazanylan belent sepgitlere konserniň «Goturdepe», «Gumdagnebit», «Galkynyşnebit» nebitgaz çykaryjy we «Goturdepe» buraw işleri müdirlikleri saldamly goşantlaryny goşdular diýlip, habarda bellenilýär.
