Türkmenistanyň «Altyn asyr» topary AFK-nyň Çempionlar ligasy – 2-niň 2024-2025-nji ýyllar möwsümindäki «öý» duşuşyklary Aşgabat şäherindäki «Köpetdag» stadionynda geçiriler. Bu barada Aziýa futbol konfederasiýasy habar berdi.
AFK-nyň Çempionlar ligasy – 2-niň toparçalaýyn tapgyrynda geografiýa taýdan 2 sebite Günbatar we Gündogar sebite bölünen 32 topar çykyş eder.
Malaýziýanyň Kuala-Lumpur şäherinde geçirilen bije atyşlyga görä, Aziýanyň ikinji derejeli klublarynyň ýaryşynda Saud Arabystanyň «Al-Taawun», Yragyň «Eýr Fors» we Bahreýniň «Al-Haldiýa» toparlary «Altyn asyr» toparynyň garşydaşlary bolar. Bu futbol toparlary «B» toparçada bäsleşerler.
Galan toparlaryň düzümleri:
«Günbatar» sebit
«A» toparça: «Al-Wakra» (Katar), «Traktor» (Eýran), «Mohun Bagan Super Jýänt» (Hindistan), «Rawşan» (Täjigistan).
«C» toparça: «Sepahan» (Eýran), «Şarja» (BAE), «Istiklol» (Täjigistan), «Al-Wehdat» (Iordaniýa).
«D» toparça: «Şabab Al-Ahli» (BAE), «Nasaf» (Özbegistan), «Al-Hussein Irbid» (Iordaniýa), «Al-Kuwait» (Kuweýt).
«Gündogar» sebit
«E» toparça: «Sanfreççe Hirosima» (Ýaponiýa), «Sidneý» (Awstraliýa), «Kaýýa Iloilo» (Filippinler), «Istern» (Gonkong).
«F» toparça: «Çžeszýan» (Hytaý), «Port» (Taýland), «Lion Siti Seýlors» (Singapur), «Persib Bandung» (Indoneziýa).
«G» toparça: «Bangkok Ýunaýted» (Taýland), «Nam Din» (Wýetnam), «Li Man» (Gonkong), «Tampins Rowers» (Singapur).
«H» toparça: «Çonbuk Hýonde Motors» (Koreýa Respublikasy), «Selangor» (Malaýziýa), «Muangtong Ýunaýted» (Taýland), «Dinamik Herb Sebu FK» (Filippinler).
AFK-nyň Çempionlar ligasy – 2-niň toparçalaýyn tapgyry 17-nji sentýabrdan 6-njy dekabr aralygynda geçer. Ýaryşyň bu tapgyrynda oňa gatnaşýanlar öz meýdançalarynda üç oýun, myhmançylykda-da üç oýun oýnarlar. Her topardan iň gowy iki toparça 1/8 finala çykar.
«Altyn asyr» topary AFK-nyň Çempionlar ligasy – 2-niň ilkinji duşuşygyny 2024-nji ýylyň 18-nji sentýabrynda myhmançylykda Yragyň «Eýr fors» topary bilen duşuşar. Bu toparlaryň eýýäm 2018-nji ýylda Yragyň Basra şäherinde AFK kubogynyň finalynda duşuşandyklary bellärliklidir. Şonda «Eýr fors» topary 2:0 hasabynda ýeňiş gazanypdy. 2-nji oktýabrda geçiriljek ikinji tapgyrda Türkmenistanyň wise-çempiony «Köpetdag» stadionynda Bahreýniň «Al-Haldiýa» topary bilen duşuşar.
Ondan soň Ýazguly Hojageldiýewiň şägirtleri «Al-Taawun» topary bilen yzly-yzyna iki gezek duşuşar: 23-nji oktýabrda Saud Arabystanynda, 6-njy noýabrda bolsa Aşgabat şäherinde. 5-nji tapgyrda «Altyn asyr» topary 27-nji noýabrda öz meýdançasynda «Eýr fors» (Yrak) topary bilen duşuşar. «Türkmenaragatnaşyk» agentliginiň topary AFK-nyň Çempionlar ligasy – 2-niň toparçalaýyn tapgyryny 4-nji dekabrda myhmançylykda «Al-Haldiýa» (Bahreýn) toparyna garşy duşuşygy bilen tamamlar.
