Eýranyň futbol boýunça milli ýygyndysy Dünýä çempionatynyň saýlama böleginiň dördünji tapgyrynda Kataryň ýygyndysyny kabul edip, 4:1 hasabynda ýeňdi. Ýeňiji toparyň düzüminde gollary Sardar Azmun (42-nji we 48-nji minutlar) hem-de Mohammad Mohebi (65-nji we 90+8-nji minutlar) geçirdiler Katar toparynyň ýeke-täk goluny Almoez Ali (17-nji minut) geçirdi.

Şeýle hem, şol gün geçirilen beýleki duşuşyklarda Özbegistanyň futbolçylary BAE-niň ýygyndysyny 1:0 hasabynda ýeňdiler, Gyrgyzystanyň ýygyndysy bolsa KHDR-i 1:0 hasabynda utdy. Eýran we Özbegistanyň ýygyndylary A toparçada 4 oýundan soň 10 utuk bilen öňdeligi saklaýarlar. BAE we Katar 4 utuk bilen 3-nji we 4-nji orunlary paýlaşýarlar, Gyrgyzystan (3 utuk) we KHDR (2 utuk) olaryň yzyndan gelýärler.

Geljekki duşuşyklarda, Eýran 14-nji noýabrda KHDR bilen oýnar, Özbegistan Katara garşy çykyş eder, Gyrgyzystan bolsa BAE-niň ýygyndysy bilen duşuşar. 2026-njy ýyldaky Dünýä çempionaty 11-nji iýundan 19-njy iýula çenli Meksikada, ABŞ-da we Kanadada geçiriler. Aziýanyň saýlama tapgyryndan final bölegine göni 6 ýygyndy ýollanma gazanar.