Türkmenistanda
1. Prezident Serdar Berdimuhamedow ýurduň wekiliýetine ýolbaşçylyk edip Türkmenistana gelen Azerbaýjanyň ykdysadyýet ministri Mikail Jabbarowy kabul etdi. Duşuşygyň çäklerinde söhbetdeşler gyzyklanma bildirilýän geljegi uly ugurlaryň birnäçesinde uzak möhletleýinlik, özara bähbitlilik esasynda guralýan däp bolan hyzmatdaşlygy mundan beýläk-de ösdürmegiň mümkinçiliklerini ara alyp maslahatlaşdylar.
2. 27-28-nji noýabrda täjigistanyň paýtagtynda Söwda-ykdysady we ylmy-tehniki hyzmatdaşlyk boýunça bilelikdäki türkmen-täjik hökümetara toparynyň 12-nji mejlisi geçirildi. Taraplar ikitaraplaýyn söwda-ykdysady, maýa goýum, ylmy-tehniki we ynsanperwer hyzmatdaşlygynyň giň gerimli meselelerini ara alyp maslahatlaşdylar. Energetika, suw serişdeleri, oba hojalygy, ulag, logistika, bilim, lukmançylyk, medeniýet we sport ýaly ugurlarda hyzmatdaşlygy giňeltmegiň uly mümkinçilikleriniň bardygy bellenildi. Toparyň nobatdaky mejlisini 2024-nji ýylda Aşgabatda geçirmek meýilleşdirilýär.
3. Türkmenistandan 223 mugallym Naberežnye Çelnyý döwlet pedagogika uniwersitetiniň ýörite goşmaça bilim maksatnamasyna üstünlikli gatnaşdy we ýedi ugur boýunça goşmaça bilim aldy. Türkmenistanyň ýokary we umumybilim berýän mekdepleriniň mugallymlary üçin hünär derejesini ýokarlandyryş okuwlary alty gün dowam etdi. Olary Russiýanyň hünärmenleri alyp bardylar.
4. Türkmenistandaky «Näme? Nirede? Haçan?» bäsleşigi boýunça toparlar 10-njy dekabrda Aşgabatda geçiriljek akyl-paýhas bäsleşigine çagyrylýar. Oýna gatnaşmak mugt. Toparlar düzümini öňünden kesgitlemeli we 7-nji dekabra çenli hasaba alynmaly. Bäsleşigiň dowamynda toparlar jemi 24 soraga jogap bermeli bolarlar. Bäsleşik hersi 12 soragdan ybarat iki tapgyrda geçiriler.
Dünýäde
5. Ertirlik naharynda süýt bilen patrak iýmek saglyk üçin beýle bir peýdaly däl. Diýetologlar patragyň ýokary derejede gaýtadan işlenen dänelerden taýýarlanylýandygyny, olaryň bolsa B toparyna degişli witaminler, sink we demir ýaly ýokumly maddalaryň köpüsinden mahrum bolýandygyny belleýärler. Mundan başga-da, patrakda köp mukdarda şeker bar, bu bolsa olaryň kaloriýalylygyny ýokarlandyrýar.
6. Roždestwo baýramynyň öňüsyrasynda «Microsoft» kompaniýasy «Windows XP-niň» iş stolunyň meşhur diwar suratyna bagyşlanan «Asudalyk» atly täze switerini tanyşdyrdy. «Microsoft» kompaniýasynda bellemeklerine görä, bu switer «Sapýor» oýnunyň, «Internet Explorer» programmasynyň we «pes billi jinsileriň» agdyklyk edýän has ýönekeý döwrüniň atmosferasyna aralaşmak isleýänler üçin niýetlenendir.
Sport habarlary
7. Aşgabatdaky Olimpiýa şäherçesiniň Başa-baş söweş sungaty sport toplumynda kuraş boýunça 14-nji dünýä çempionaty tamamlandy. Oňa 50 töweregi ýurtdan 200-den gowrak türgen gatnaşdy. Bäsleşigiň jemleri boýunça Türkmenistanyň milli ýygyndysy gazanylan medallaryň umumy sany boýunça iň gowy netijäni görkezdi. Türkmen türgenleri 15 medal gazandylar: 5 altyn, 6 kümüş we 4 bürünç. Aşgabatda geçirilen kuraş boýunça dünýä çempionatynda türkmen türgenleriniň dünýä çempionatlarynda eden çykyşlarynyň tutuş taryhynda rekord derejede köp medal gazanandyklaryny bellemek gerek.
