1. Türkmen sungat ussatlary Halkara bitaraplyk güni mynasybetli uly konsert guradylar. Mukamlar köşgünde geçirilen baýramçylyk konsertiniň maksatnamasy Ýewropa, Aziýa, Ýakyn Gündogar, Merkezi Aziýa we GDA ýurtlarynyň meşhur halk we döwrebap aýdymlaryndan ybarat boldy.
2. Aşgabatda her ýyl geçirilmegi däbe öwrülen Bitaraplyk binasyna gül goýmak dabarasy boldy. Oňa Prezident Serdar Berdimuhamedow gatnaşdy. Gül goýmak dabarasyna aşgabatlylar we paýtagtyň myhmanlary, şol sanda daşary ýurtlaryň wekiliýetleriniň köp sanly agzalary gatnaşdylar.
3. Aşgabatda her ýylda geçirilýän Merkezi Aziýa ýurtlarynyň daşary işler ministrleriniň orunbasarlarynyň 12-nji duşuşygy geçirildi. Duşuşyk BMG-niň Merkezi Aziýa üçin Öňüni alyş diplomatiýasy boýunça sebit merkezi tarapyndan guraldy. Türkmen tarapy MAÖDSM tarapyndan öňe sürlen Ýaşlar üçin öňüni alyş diplomatiýasynyň akademiýasy we Merkezi Aziýa ýurtlarynyň zenanlarynyň dialogy ýaly dialog meýdançalaryny ösdürmegi goldaýandygyny beýan etdi.
4. Lebap welaýatynyň merkezinde ähli amatlyklary bolan 40 sany 4 gatly, her biri 32 öýli ýaşaýyş jaýlar toplumy açylyp ulanylmaga berildi. Ýaşaýyş jaýlar toplumynyň gurluşygyna 2020-nji ýylyň noýabrynda badalga berlipdi. Iki ýylyň içinde bolsa meýilnamada göz öňünde tutulan ähli desgalar ulanylmaga berildi.
5. Ekologiýa taýdan arassa materiallardan ýasalan ýa-da alternatiw energiýa çeşmelerini peýdalanýan arçalar barha meşhurlyga eýe bolýar. Mysal üçin, Rimde elektrik girlýanda bezegleri Gün batareýasynyň energiýasy bilen işleýän Täze ýyl arçasy oturdyldy, Liwanda bolsa 80 000 plastik çüýşeden ýasalan plastik arça oturdyldy.
6. Russiýanyň we Awstriýanyň alymlary dünýäde deňi-taýy bolmadyk pişik allergiýasyna garşy sanjym döretdiler. Sanjym deslapky klinika synaglaryndan geçdi we 2023-nji ýylda başlanmagy göz öňünde tutulýan kliniki hem-de toksikologiki synaglara taýýardyr, şondan soň derman hasaba alnar.
7. Türkmenistanly Rejepbaý Rejepow Kolumbiýada geçirilen agyr atletika boýunça dünýä çempionatynda 81 kilograma çenli agram derejesinde kümüş medala mynasyp boldy. Rejepow iki maşk boýunça 366 kg netije görkezdi, ol birbada götermekde 164 kg we silterläp götermekde 202 kg netije gazandy. Ýaryşa türgeni taýýarlan Türkmenistanyň at gazanan tälimçisi Artur Emirýandyr.
8. Aşgabatda futbol boýunça Türkmenistanyň Kubogynyň finaly geçirildi. Ýaryşyň esasy oýnunda «Ahal» we «Şagadam» duşuşdy. Duşuşyk 5:0 hasabynda «Ahalyň» ýeňşi bilen tamamlandy. Bu «Ahalyň» Türkmenistanyň Kubogyndaky dördünji ýeňşidir. Toparyň futbol boýunça Türkmenistanyň häzirki çempionatyndaky bu üstünligine 34 ýaşly baş tälimçisi Mergen Orazow getirdi.
9. Futzal boýunça Türkmenistanyň Superligasynda jemleýji tapgyryň duşuşyklary geçirildi, şondan soň çempion we baýrakly oýunlary eýelän toparlar kesgitlenildi. Birinji orny Türkmenbaşynyň «Denizçi» topary aldy. Türkmenbaşy Halkara deňiz portunyň topary Aziýa ýaryşynda – AFK-2023 futzal boýunça toparlaýyn çempionatynda çykyş etmäge hukuk gazandy. «Köpetdag» topary Türkmenistanyň çempionatynyň kümüş medalyna, «Senagatbank» bolsa bürünç medala mynasyp boldy.
