Türkmenistanyň Prezidenti Germaniýanyň Magdeburg şäherinde bolup geçen pajygaly waka bilen baglanyşykly gynanç hatyny iberdi, Türkmenistandaky ähli kärhanalaryň işgärlerine Täze ýyl baýramçylygynyň öňüsyrasynda aýlyk zähmet haklary berildi, «Arkadag» we «Ahal» futbol boýunça Türkmenistanyň Kubogynyň finalynda oýnarlar we beýleki habarlar
Türkmenistanda
1. Prezident Serdar Berdimuhamedow Germaniýa Federatiw Respublikasynyň Prezidenti Frank-Walter Ştaýnmaýere ýurduň Magdeburg şäheriniň Täze ýyl bazarynda bolup geçen, adam pidalaryna we şikes ýetmelere getiren pajygaly waka zerarly gynanç hatyny iberdi.
2. Prezident Serdar Berdimuhamedow sanly ulgam arkaly nobatdaky Hökümet mejlisini geçirdi. Mejlisiň gün tertibine döwlet durmuşynyň birnäçe möhüm meseleleri girizildi. Döwlet Baştutany Mejlisiniň Başlygynyň maglumatlaryny, wise-premýerleriň hem-de Ministrler Kabinetiniň ýanyndaky Ulag we kommunikasiýalar agentliginiň Baş direktorynyň hasabatlaryny diňledi.
Wise-premýer H.Geldimyradow eýeçiligiň görnüşine garamazdan, edara-kärhanalaryň ähli işgärlerine noýabr-dekabr aýlary üçin zähmet haklarynyň, pensiýalaryň, döwlet kömek pullarynyň, talyp we diňleýji haklarynyň 20-nji dekabra çenli doly tölenendigi barada hasabat berdi.
Türkmenistanyň daşary işler ministri Raşid Meredow Malaýziýanyň 2025-nji ýylda Günorta-Gündogar Aziýa ýurtlary birleşiginde (ASEAN) başlyklyk etjekdigini göz öňünde tutup we hyzmatdaşlygy giňeltmek maksady bilen, Türkmenistanyň «Merkezi Aziýa + ASEAN» formatyny döretmek baradaky başlangyjyny durmuşa geçirmäge girişmegiň teklip edilýändigi barada döwlet Baştutanyna habar berdi.
3. Prezident Serdar Berdimuhamedow «Türkmenistanyň raýat awiasiýasynyň awiasiýa howpsuzlygyny üpjün etmegiň Döwlet maksatnamasyny» tassyklamak hakynda Karara gol çekdi.
Şeýle hem döwlet Baştutany degişli Karara gol çekip, «Türkmennebit» döwlet konsernine Seýdiniň nebiti gaýtadan işleýän zawodynyň önümçilik desgasynyň maddy-üpjünçilik binýadyny mundan beýläk-de pugtalandyrmak üçin degişli işleri geçirmäge ygtyýar berdi.
4. Türkmenistanda 2025-nji ýylyň 1 — 10-njy ýanwary aralygynda çagalar baglarynda, umumybilim berýän orta mekdeplerde, medeni-dynç alyş merkezlerinde, seýilgählerde Täze ýyl dabaralaryny geçirmek meýilleşdirilýär. Şol sanda çagalara niýetlenen sahna oýunlarydyr kinofilmleriň görkezilişleri, ýaşlaryň arasynda döredijilik bäsleşikleri, ýurduň taryhy-medeni ýerlerine, muzeýlere gezelençler göz öňünde tutulýar. Şeýle hem zehinli çagalara Gulbaba adyndaky çagalar baýragynyň gowşurylyş dabarasy geçiriler.
Dünýäde
5. Braziliýanyň Hökümeti 2025-nji ýylda BRIKS guramasynda başlyklyk etmeginiň resmi nyşanyny çap etdi. Onuň diýaznynyň esasy elementi hökmünde Amazoniýa jeňňelliklerinde ösýän sumauma atly gowaça agajy şekillendirilipdir. Onuň şekili BRIKS guramasyna agza döwletleriň baýdaklarynyň reňkinde ýerine ýetirilipdir.
6. Hytaýyň Harbin şäherinde «Buzuň we garyň uly dünýäsi» atly 26-njy festiwalyň – buzdan we gardan ýasalan dünýädäki iň uly mowzuklaýyn seýilgähiň açylyş dabarasy boldy. Seýilgähiň özboluşly desgalarynyň gurluşygy üçin 300 müň kub metr gar we buz gerek boldy. Bu ýyl toplumyň dizaýny Harbinde geçiriljek Aziýanyň gyşky oýunlary – 2025-den ylham alnyp taýýarlanypdyr. Seýilgähiň meýdany festiwalyň tutuş taryhynda rekord göwrüme – 1 million inedördül metre ýetdi, bu bolsa geçen ýyldakydan 200 müň inedördül metr uludyr.
Sport täzelikleri
7. Futbol boýunça Türkmenistanyň Kubogynyň aýgytly oýny «Arkadag» we «Ahal» toparlarynyň arasynda geçiriler. Ýaryşyň ýarym finalynda «Arkadag» Balkanabadyň «Nebitçisini» jemi 12:4 hasabynda iki gezek ýeňdi, beýleki ýarym finalda «Ahal» ýeňiji diýlip yglan edildi, «Altyn Asyr» bilen iki oýunda-da topara 3:0 hasabynda tehniki ýeňiş berildi. Ýaryşyň finaly 23-nji dekabrda, duşenbe güni bolar. Duşuşyk «Aşgabat» stadionynda geçiriler.
8. Nusgawy, çalt we blits küşt boýunça çagalaryň we ýetginjekleriň arasynda Türkmenistanyň çempionatyna 350-den gowrak mekdep okuwçysy gatnaşdy. Bäsleşige Aşgabat we Arkadag şäherlerinden, Ahal, Lebap, Mary we Daşoguz weleýatlaryndan türgenler gatnaşdy. Şeýle hem ilkinji hususy professional küşt akademiýasy bolan «Küşt Älemi» toparynyň ilkinji gezek gatnaşýandygy yglan edildi. Türkmenistanyň Küşt federasiýasynyň metbugat gullugynyň belleýşi ýaly, Lebap welaýatynyň wekilleri has üstünlikli çykyş etdiler we umumy topar sanawynda birinji orny eýelediler. Olar mümkin bolan 108 medaldan 67 medala mynasyp boldular, şolaryň 27-si altyn medallardyr.
