«Marytelekom» welaýat elektrik aragatnaşyk kärhanasynyň Tagtabazar etrap aragatnaşyk bölüminiň täze döwrebap edara binasy açylyp ulanmaga berildi. Bu bina etrap merkezine aýratyn gözellik berýär diýlip, «Türkmenistan» gazetinde habar berildi.
Habarda bellenilişi ýaly, 2 gatdan, 16 sany önümçilik we iş maksatly otaglardan ybarat bina sanly ulgamyň kämil enjamlary bilen üpjün edilipdir. Munuň özi etrabyň ýaşaýjylaryna aragatnaşyk hyzmatynyň dürli görnüşini ýokary hilli guramaga ýardam berer.
Döwrebap optiki-süýümli aragatnaşyk geçirijileriň çekilmegi oba ýerlerinde amal edilýän işleriň-de hilini gowulandyryp, müşderilere hyzmatlary ýokary derejä galdyrmaga mümkinçilik açdy. Etrabyň Gulja, Ahal, Ak ýol, Daşköpri, Sandykgaçy, Üzümli geňeşliklerine, Ýeňiş obasyna, mahlasy, jemi ýedi ýere «GPON» enjamlary oturdyldy. Optiki-süýümli aragatnaşyk geçirijileriniň çekilen ilatly nokatlarynda ýüzlerçe müşderi aragatnaşygyň täze hyzmatlaryndan peýdalanyp biler. Obalarda öňdebaryjy «HUAWEI» kompaniýasynyň ýokary tehnologiýaly, sanly ulgama daýanýan «GPON» enjamlary oturdyldy.
