17-nji noýabrda Türkmenistanyň Prezidenti Serdar Berdimuhamedow Ministrler Kabinetiniň sanly ulgam arkaly nobatdaky mejlisini geçirdi. Onda ulag ulgamyny, söwda-ykdysady hyzmatdaşlygy we beýleki pudaklary durnukly ösdürmek boýunça halkara maslahatlara hem-de forumlara görülýän taýýarlygyň meseleleri ara alnyp maslahatlaşyldy.
Şeýle hem howanyň üýtgemeginiň meseleleri bilen baglanyşykly öňde boljak halkara çärelerine Türkmenistanyň işjeň gatnaşmagy göz öňünde tutuldy. Mundan başga-da, ýurtda giň gerimli infrastruktura taslamalaryny durmuşa geçirmek, bilim ulgamyny kämilleşdirmek boýunça işler, şeýle hem oba hojalyk ekinlerini ýygnap almak möwsümi dowam edýär.
Öňde boljak wakalar
26-njy noýabrda Türkmenistanda «Bütindünýä durnukly ulag güni» Kararnamasynyň kabul edilmegi mynasybetli «Durnukly ulag: durnukly ösüşe goşant» atly halkara ylmy-amaly maslahat we sergi geçiriler.
26-njy noýabrda Aşgabatda Ulag-üstaşyr geçirmek we logistika meseleleri boýunça türkmen-gazak bilelikdäki iş toparynyň birinji duşuşygy geçiriler.
28 — 30-njy noýabr aralygynda Aşgabatda «Agro-Pak Türkmenistan — 2023» atly halkara sergi geçiriler. Oňa azyk we oba hojalyk önümlerini öndürmek, gaplamak, saklamak, gaýtadan işlemek bilen meşgullanýan kompaniýalar gatnaşar. Gözden geçirilişiň çäklerinde tejribe alyşmak hem-de hyzmatdaşlygy ýola goýmak maksady bilen, ikitaraplaýyn duşuşyklar guralar.
27-28-nji noýabrda Aşgabatda Ykdysady hyzmatdaşlyk boýunça hökümetara türkmen-azerbaýjan toparynyň 7-nji mejlisi geçiriler. Oňa dürli pudaklartdan, şol sanda nebitgaz, dokma, oba hojalyk, gurluşykda, derman senagaty, ulag-logistika, maglumat tehnologiýalary we beýleki ugurlarda işleýän kompaniýalar gatnaşar.
30-njy noýabr — 12-nji dekabr aralygynda Türkmenistanyň wekiliýeti Dubaý şäherinde (BAE) geçiriljek BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatyna (COP-28) gatnaşar.
26 — 28-nji noýabrda Türkmenistanyň wekiliýeti Dubaý şäherinde geçiriljek howanyň üýtgemegine garşy göreşmek boýunça Ýaşlar maslahatyna (COY-18) gatnaşar.
Gurluşyk
Aşgabatda gurulmagy meýilleşdirilýän täze «Güneşli» çagalar we ýetginjekler merkezinde çagalar üçin sport we oýun meýdançalary, medeni çäreleri geçirmek üçin ýörite meýdançalar, amfiteatr, ýol hereketiniň düzgünlerini öwrenmek üçin meýdança we beýleki desgalar, şol sanda tehniki, hojalyk desgalary göz öňünde tutuldy.
Prezident Serdar Berdimuhamedow merkezi gurmak boýunça halkara bäsleşigiň netijeli geçmegini üpjün etmegi tabşyrdy.
Maliýe
Türkmenistanda gymmat bahaly metallar we daşlar bilen baglanyşykly bank edaralarynyň ygtyýarlandyrmak işlerini guramak boýunça resminamalaryň taslamalaryny taýýarlamak işleri alnyp barylýar. Bu barada Ministrler Kabinetiniň mejlisinde ykdysadyýet toplumyna gözegçilik edýän wise-premýer Hojamyrat Geldimyradow hasabat berdi.
Bilim
Prezident Serdar Berdimuhamedow Türkmenistanyň Prezidentiniň ýanyndaky Döwlet gullugy akademiýasynyň gurluşyny, şeýle hem akademiýa okuwa kabul etmegiň tertibini tassyklamak hakynda Karara golçekdi. Resminama akademiýanyň täze binalar toplumynda döredilen döwrebap şertlere laýyklykda, okuw we edara ediş işini has-da kämilleşdirmek maksady bilen, degişli ministrlikleriň teklipleri göz öňünde tutulyp taýýarlanyldy.
Türkmen talyplarynyň 25-si Polşada geçirilen Halkara toparlaýyn matematika olimpiadasynda üstünlikli çykyş edip, 8 altyn, 11 kümüş we 6 bürünç medala mynasyp boldular.
Türkmenistanyň ýokary okuw mekdeplerinde ekologiýa, biologiýa, inžener we kompýuter grafikasy, rus dili hem-de fizika boýunça talyplaryň arasynda halkara internet olimpiadalarynyň birnäçesi geçiriler. 2024-nji ýylyň mart aýynyň üçünji ongünlüginde Arkadag şäheriniň 1-nji ýöriteleşdirilen okuw-terbiýeçilik toplumynda mekdep okuwçylarynyň arasynda Halkara matematika olimpiadasyny geçirmek meýilleşdirilýär.
Halkara hyzmatdaşlygy
Türkmenistan şu ýylyň 30-njy noýabry — 12-nji dekabry aralygynda Dubaý şäherinde geçiriljek BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatyna (COP-28) gatnaşmaga taýýarlyk görýär. Şunuň bilen baglylykda, Aşgabat «COP-28» maslahatynda kabul ediljek halkara resminamalara goşulmak baradaky meselä garamak üçin bu resminamalary öwrener we seljerer.
Oba hojalygy
Türkmenistanyň Daşoguz we Lebap welaýatlarynda şaly hasylynyň 72 müň 246 tonnasy ýygnaldy. Ýurtda pagta ýygymy dowam edýär. Mary welaýatynda gant şugundyrynyň hasylyny ýygnamak işleri alnyp barylýar, ýygnalan hasyly saklamak we gaýtadan işlemek boýunça zerur çäreler görülýär.
