GDA-nyň Ýerine ýetiriji komitetiniň bölüminde GDA agza ýurtlaryň adam hukuklary boýunça ygtyýarly wekilleriniň — Adalatçylarynyň mejlisi geçirildi. GDA-nyň Ýerine ýetiriji komitetiniň metbugat gullugynyň habar bermegine görä, mejlise Türkmenistandan Adalatçy Ýazdursun Gurbannazarowa gatnaşdy.
Duşuşyga Azerbaýjan Respublikasynyň Adalatçysy Sabina Aliýewa, Ermenistan Respublikasynyň Adam hukuklaryny goraýjysynyň orunbasary, raýat, durmuş-ykdysady we medeni hukuklary goramak boýunça Departamentiniň başlygy Wladimir Ogannisýan, Gazagystanyň adam hukuklary boýunça Milli merkeziniň başlygy Zere Utebaýewa, Gyrgyz Respublikasynyň Adalatçysy Atyr Abdrahmatowa, Russiýa Federasiýasynyň Adam hukuklary boýunça ygtyýarly wekili Tatýana Moskalkowa, Adam hukuklary boýunça ygtyýarly wekiliň Orunbasary — Täjigistan Respublikasynda Çaga hukuklary boýunça ygtyýarly wekil Miçgona Boboçonzoda, Özbegistan Respublikasynyň Adalatçysy Feruza Eşmatowa, şeýle hem synçy hökmünde Belarus Respublikasynyň Milli Assambleýasynyň Adam hukuklary, etniki gatnaşyklar we metbugat boýunça hemişelik toparynyň başlygy Gennadiý Dawydko hem-de GDA-nyň Ýerine ýetiriji komitetiniň başlygy Sergeý Lebedew gatnaşdy.
«Siziň egniňize adam hukuklaryny goramak ýaly asylly wezipe düşýär. Raýatlarymyzyň hukuklaryny we kanuny bähbitlerini ygtybarly goramak, esasan, siziň netijeli işiňize baglydyr. Bu günki gün Arkalaşygyň giňişliginde adam hukuklaryny üpjün etmek we goramak işini alyp barýan adam hukuklary boýunça ygtyýarly wekilleriň we ähli döwlet gurluşlarynyň tagallalaryny birleşdirmegiň zerurlygy äşgärdir. GDA ýurtlary döwletlerimiziň sebitleýin, milli, medeni we taryhy aýratynlyklaryny göz öňünde tutup, adam hukuklaryny goramak babatynda özara peýdaly we birek-birege hormat goýmaga esaslanýan hyzmatdaşlygy güýçlendirmäge doly taýýardyr» diýip, GDA-nyň Ýerine ýetiriji komitetiniň başlygy Sergeý Lebedew mejlisde belläp geçdi.
