Aşgabadyň “Olimpiýa” myhmanhanasynda futzal boýunça 2020-nji ýylda geçiriljek Aziýa çempionatynyň bijeleri çekildi. Yklym ýaryşy Aşgabat şäherinde 26-njy fewral – 8-nji mart aralygynda geçiriler. Bije çekilişik dabarasynda Türkmenistanyň ýygyndysynyň kapitany Abdylla Gurbannepesow “Türkmenportalyň” žurnalistine interwýu berdi.
― Abdylla, Türkmenistan futzal boýunça Aziýa çempionatyny ilkinji gezek kabul edýär. Öz ýurdumyzda geçirilýän çempionatda milli ýygyndymyzyň üstünlikli çykyş etmegi belli bir derejede kapitana hem bagly.
― Men muňa aňryýany bilen düşünýärin. Toparyň kapitany hökmünde oglanlara ruhy tarapdan, umuman, hemme tarapdan goldaw berýärin.
― Siziň pikriiňizçe, çempionatdaky iň güýçli ýygyndylar haýsylar?
― Ilkinji nobatda Eýran. Olar yzda galan 15 çempionatyň 12-siniň ýeňijisi. Soňra Ýaponiýa, Tailand we Özbegistan.
― Toparçada Türkmenistan haýsy ýygyndyny özi üçin has güýçli garşydaş hasaplaýar?
― Wýetnamyň ýygyndysy bilen duşuşygymyz has kyn geçer. Ýöne jemleýji ýaryşa çykan bolsalar, Täjigistan bilen Omana-da gowşak garşydaş diýip bolmaz. Umuman, toparçamyzda, ejiz wekil ýok.
― Türkmenistanyň ýygyndysynyň taýýarlyk derejesi nähili?
― Ýylyň başyndan bäri Horwatiýada, Kuweýtde, Türkiýede, Bolgariýada okuw-türgenleşik ýygnanyşyklaryny geçirdik, halkara ýaryşlara, ýoldaşlyk duşuşyklaryna gatnaşdyk. Aziýa çempionatyna çenli hem meýilleşdirýän ýygnanyşyklarymyz bar. Umuman, taýýarlyk ýokary derejede.
― Baş tälimçi Türkmenistanyň futbol toparynyň ýarym finala çykmak mümkinçiliginiň bardygyny aýtdy. Bu barada siz nähili pikirde?
― Tälimçimiz ynanýan bolsa, biz hem ynanýarys. Baý tejribe topladyk, güýçli garşydaşlar bilen duşuşyklary geçirdik. Öz güýjümiziň ölçegini bilýäris. Nesip bolsa, iň gowy, iň mynasyp oýun bilen janköýerlerimizi begendirmäge çalşarys.
― Abdylla, söhbetdeşlik üçin sag boluň! Size Aziýa çempionatynda üstünlik arzuw edýäris!