Şu gün Gyrgyzystanyň Oş şäherindäki A.Suýumbaýewiň adyny göterýän stadionda Türkmenistanyň Aragatnaşyk ministrliginiň "Altyn asyr" topary şäheriň "Alaý" topary bilen duşuşdy. Duşuşyk türkmen futbolçylarynyň uly hasapdaky ýeňşi bilen tamamlandy.
Duşuşygyň eýýäm 11-nji minudynda geçen möwsümiň iň gowy futbolçysy Myrat Ýagşyýewiň geçiren goly bilen "aragatnaşykçylar" hasaby açdylar. 19-njy minutda Altymyrat Annadurdyýew hasaby 2:0-a çykardy. Birinji ýarymyň esasy wagtynyň tamamlanmagyna 6 minut galanda ýer eýeleri "Altyn asyryň" derwezesinden bir jogap pökgüsini geçirdiler. Ýöne Ilýaz Alimowyň geçiren bu goluna "Altyn asyryň" jogaby gijikmedi. 40-njy minutda türkmen futbolynyň şu ýaryşda - AFK-nyň kubogynda iň kän tapawutlanan wekili Altymyrat Annadurdyýew duşuşykdaky özüniň ikinji, toparynyň üçünji goluny geçirdi. Şeýlelikde, ildeşlerimiz 3:1 hasabyndaky üstünlik bilen arakesmä çykdylar.
Ikinji ýarymyň başynda, duşuşygyň bolsa umumylykda 46-njy minudynda "Alaý" Joel Kohonyň goly bilen aralygy ýene ýygyrdy. Olaryň hasaby deňlemek baradaky arzuwy bolsa başa barmady. 51-nji minutda Myrat Ýagşyýew toparynyň dördünji goluny hem derwezeden geçirdi. 57-nji minutda hasap 3:4-e geldi. Ýöne Maksadbek Alimowyň geçiren bu pökgüsi ýer eýeleriniň şu duşuşykdaky iň soňky goly boldy. Oňa derek, "aragatnaşykçylar" Oş şäheriniň derwezesine ýene iki pökgini "ýadygärlik" goýup gaýtdylar. 84-nji minutda Altymyrat Annadurdyýew het-trigini amala aşyrdy. Esasy wagtyň tamamlanmagyna 2 minut galanda bolsa "Altyn asyryň" täze transferi Begmyrat Baýow hasaby biziň futbolçylarymyzyň peýdasyna 6:3-e çykardy. Duşuşyk şu hasap bilen hem tamamlandy.
AFK-nyň kubogy, "D" toparça
Birinji tapgyr
"Alaý" - "Altyn asyr" - 3:6.
Gollar:
Ilýaz Alimow 39, Joel Koho 46, Maksadbek Alimow 57 - Myrat Ýagşyýew 11, 51, Altymyrat Annadurdyýew 19, 40, 84, Begmyrat Baýow 88.