«Türkmenistan» awiakompaniýasy Moskwa – Bangkok uçuşlary üçin alternatiw ugurlary guraýar, Aşgabatda hindi kinosynyň saz agşamy geçiriler, Özbegistan Türkmenistandan ýük awtoulaglary üçin giriş tölegini ýokarlandyrdy we beýleki habarlar
Türkmenistanda
2. Aşgabat şäheriniň ýaşaýjylary we myhmanlary 9-njy ýanwarda Mukamlar köşgünde geçiriljek hindi kinosynyň saz agşamyna gatnaşmaga çagyrylýar. Saz agşamy Hindistanyň ilçihanasy hem-de Türkmenistanyň Medeniýet ministrligi tarapyndan bilelikde guralar. Konsertde Resul Gylyjowyň dirižýorlyk etmeginde Türkmenistanyň Döwlet simfoniki orkestri tarapyndan meşhur hindi filmleriniň sazlary ýerine ýetiriler.
3. 2025-nji ýyl üçin Özbegistanyň döwlet býujeti baradaky kanunyna laýyklykda, Hökümet Respublikanyň çägine daşary ýurt ýük ulaglarynyň girmegi üçin töleg nyrhlaryny täzeden gözden geçirdi. Türkmenistanda hasaba alnan ýük ulaglary üçin ýük göterijiligine baglylykda täze nyrhlar kesgitlenildi: 10 tonna çenli — $130, 10-dan 20 tonna çenli — $180, 20 tonnadan ýokary — $250.
4. Moskwanyň we Bütin Rusuň Patriarhy Kirill iberen Täze ýyl gutlagynda Türkmenistanyň Prezidentine işinde üstünlikleri arzuw etdi. Rus prawoslaw ybadathanasynyň ýolbaşçysy geçen ýylyň dürli ugurlarda köp sanly wakalar we üstünlikler bilen tapawutlanandygyny aýtdy. «Size berk jan saglyk, Beýik Biribaryň medet bermegini, işiňizde uly üstünlikleri arzuw edýärin» diýip, Rus prawoslaw ybadathanasynyň ýolbaşçysy gutlagynda aýtdy.
Dünýäde
5. Hytaýda uzynlygy 22 kilometre barabar bolan dünýäde iň uzyn ýokary tizlikli «Týanşan Şenli» awtoulag ýol ötüginiň gurluşygy üstünlikli tamamlandy. Taslama ýurduň demirgazyk-günbatar böleginde, çylşyrymly howa şertleri bilen tanalýan Sinszýan etrabynda durmuşa geçirildi. Ötügiň gurluşygy ýedi ýyldan gowrak wagt dowam etdi.
6. Sekiz ýyllap dowam eden ýuridik gapma-garşylykdan soň, Golliwudyň iň köp ses getiren maşgala dramalarynyň biri tamamlandy. «People» neşiriniň berýän maglumatlaryna, Bred Pitt we Anjelina Joli aýrylyşmak we emläk bölünişigi barada ahyrky netijä geldiler. Meşhur är-aýalyň aýrylyşmagy 2016-njy ýylyň sentýabr aýynda Joli «ylalaşyp bolmajak düşünişmezlige» salgylanyp, aýrylyşmak üçin ýüz tutanda başlandy. Jübüt 12 ýyl bilelikde ýaşady, şol sanda iki ýyl resmi nikada durdy. Alty çagany eklemek we bilelikde satyn alnan emlägi bölüşmek boýunça çylşyrymly gepleşikler sebäpli dawany çözmek köp ýyllap dowam etdi.
Sport habarlary
7. «Bawariýanyň» derwezebany Manuel Noýer gapyrgasy döwülenden soň topar bilen türgenleşige gaýtadan girişdi. Noýer 3-nji dekabrdan bäri oýna gatnaşmady, şonda ol «Bawariýanyň» düzüminde Germaniýanyň Kubogy ugrundaky oýunda karýerasynda ilkinji gezek meýdançadan çykaryldy. Duşuşygyň 17-nji minudynda «Lewerkuzeniň» oýunçysy Žeremi Frimpong bilen çaknyşdy we gyzyl kart aldy. Soňra «Bawariýanyň» baş tälimçisi Wensan Kompani Noýeriň ýylyň ahyryna çenli çykandygyny habar berdi. «Bawariýa» Bundesligada indiki duşuşygy 11-nji ýanwarda myhmançylykda Menhengladbahyň «Borussiýa» toparyna garşy geçirer, 6-njy ýanwarda bolsa Awstriýanyň «Salsburgy» bilen ýoldaşlyk duşuşygyny geçirer.
8. Saud Arabystanynda geçirilýän Italiýanyň Super kubogynyň ýarym final duşuşygynda Milanyň «Interi» «Atalantadan» üstün çykdy. Duşuşyk «Interiň» peýdasyna 2:0 hasabynda tamamlandy. Iki goly hem 49-njy we 61-nji minutda Denzel Dýumfris saldy. Ýaryşyň finalynda «Inter» 3-nji ýanwarda geçiriljek «Ýuwentus» bilen «Milanyň» arasyndaky oýnuň ýeňijisi bilen duşuşar.
9. Türkmenistanyň «Arkadag» futbol kluby ýanwar aýynda Türkiýede okuw-türgenleşik ýygnanyşygyny geçirer. Wladimir Baýramowyň toparynyň garşydaşlarynyň biri «Kaýsar» kluby bolar. Gazak klubunyň metbugat gullugynyň habar bermegine görä, «Arkadag» bilen «Kaýsaryň» arasyndaky ýoldaşlyk duşuşygyny 18-nji ýanwarda geçirmek meýilleşdirilýär.
