«Türkmennebit» döwlet konserniniň «Nebitgazburawlaýyş» trestiniň «Goturdepe» buraw işleri müdirliginde 2024-nji ýylda täze guýularyň jemi 12-siniň gazuw işleri tamamlanyp, meýilnama abraý bilen hötde gelindi. Guýularyň 9-sy ulanyş maksatly bolup, häzirki günlerde uglewodorod çig mallaryny bolluk bilen eçilýär diýlip, «Türkmenistan» gazetinde habar berildi.
Müdirlik boýunça geçen önümçilik ýylynda burawlanan dag jynslarynyň umumy çuňlugy 62 metre golaýladylyp, meýilnama 126,4 göterim berjaý edildi. Şol çuňluklaryň 47596 metriniň ulanyş maksatly gazylandygy aýratyn bellärliklidir.
Habarda bellenilişi ýaly, daşary ýurtlardan satyn alnan has kuwwatly buraw enjamlaryna eýe kärhananyň burawlaýjylary üstümizdäki ýylyň ilkinji günlerinden täze çuňluklary açmagy we özleşdirmek üçin elýeterli gorlary ep-esli giňeltmegi maksat edinýärler. Häzirki günlerde «Demirgazyk Goturdepe» ýatagynda 6, «Uzynadada» bolsa 2 täze guýynyň gazuw işleri ýokary depginde alnyp barylýar diýlip, habarda bellenilýär.
