Türkmenistanda Gulbaba adyndaky çagalar baýragyna mynasyp bolan 90 çaga sylaglandy, Hytaýda Türkmenistandaky «Bagt köşgüniň» buzdan nusgasy döretdiler, «Türkmenistan» awiakompaniýasy Moskwadan Aşgabat şäherine uçuş guraýar we beýleki habarlar
Türkmenistanda
1. «Türkmenistan» awiakompaniýasy Moskwa — Aşgabat ugry boýunça goşmaça uçuşlaryň guralandygyny habar berdi. Täze meýilnama 2 – 13-nji ýanwar aralygynda uçuş petekleri bolan ýolagçylara degişlidir. Uçuş 6-njy ýanwarda Domodedowo howa menzilinden Moskwa wagty bilen 23:55-de meýilleşdirilýär.
2. Aşgabatda Türkmenistanyň Magtymguly adyndaky Ýaşlar guramasynyň Merkezi geňeşiniň we ýurduň Bilim ministrliginiň bilelikde guramagynda Gulbaba adyndaky çagalar baýragyna mynasyp bolanlary sylaglamak dabarasy geçirildi. Şu ýyl bu baýraga 90 çaga we iki sany çagalar döredijilik topary mynasyp boldy.
3. Hytaýyň Harbin şäherinde geçirilen 26-njy «Buzdan we gardan şekilleriň uly dünýäsi» festiwalynda Aşgabadyň «Bagt köşgüniň» takyk ýerine ýetirilen buzdan nusgasy görkezildi. Buzdan şekil döretmegiň ussatlary binanyň ähli düzüm böleklerini, şol sanda onuň öň tarapyndaky nepis nagyşlary we sekiz gyraňly özboluşly kub şekilini dikeltdiler. Köşgüň buz heýkeli Aziýanyň Olimpiýa geňeşine agza 42 ýurduň gözel ýerlerine bagyşlanan uly serginiň bir bölegi boldy. Bu gar seýilgähini döretmek üçin 300 müň kub metr buz we gar ulanyldy.
4. Gazagystan Respublikasynyň Premýer-ministri Olžas Bektenow Türkmenistanyň Prezidenti Serdar Berdimuhamedowa Täze ýyl gutlagynda ýurtlaryň arasynda 2024-nji ýylda gatnaşyklaryň täze belentliklere ýetendigini nygtady. Bektenow Serdar Berdimuhamedowa berk jan saglyk, döwlet işlerinde üstünlikler, Türkmenistanyň doganlyk halkyna bolsa parahatçylyk, abadançylyk we bagtyýarlyk arzuw etdi.
5. S.A.Nyýazow adyndaky Türkmen oba hojalyk uniwersiteti Ýüpek ýolunyň uniwersitetler bileleşiginiň düzümine goşuldy. Ýüpek ýolunyň uniwersitetler bileleşigi ýokary bilimde halkara hyzmatdaşlygy ösdürmegi maksat edinýän hökümete degişli bolmadyk täjirçilik däl guramadyr. Bu gurama 2015-nji ýylda Hytaý Halk Respublikasynyň «Bir guşak, bir ýol» daşary syýasy başlangyjynyň çäginde döredildi we takmynan, 170 ýokary okwu mekdebini birleşdirýär.
Dünýäde
7. Meşhur «Burj Khalifa» binasy açylmagynyň 15 ýyllygyny belleýär. Beýikligi 828 metre ýetýän bu binagärlik eseri 2010-njy ýylda dabaraly ýagdaýda halka hödürlendi. Bu bina diňe bir dünýäniň iň beýik binasy bolmak bilen çäklenmän, eýsem, dünýäniň dürli künjeklerinden millionlarça adamy özüne çekip, Dubaýyň hakyky nyşanyna öwrüldi.
Sport täzelikleri
8. Baş tälimçi Kamil Mingazowyň ýolbaşçylygyndaky Türkmenistanyň futzal boýunça zenanlar ýygyndysy 2025-nji ýyldaky Aziýa kubogynyň saýlama ýaryşyna gatnaşmak üçin Daşkende geldi. Toparyň düzüminde 15 oýunçy, şol sanda 5 daşary ýurtly oýunçy bar. Bije çekişligiň netijeleri boýunça türkmen topary «C» toparça düşdi we bu toparçada Özbegistanyň, Awstraliýanyň, Filippinleriň we Kuweýtiň toparlary bilen duşuşar. Mingazowyň şägirtleri ilkinji oýnuny 11-nji ýanwarda Awstraliýanyň milli ýygyndysyna garşy oýnar. «C» toparçadaky oýunlaryň hemmesi 11 – 19-njy ýanwar aralygynda Daşkende geçiriler.
