Türkmenistanly türgenler Türkiýäniň Antalýa şäherinde geçirilen kýokuşinkaý karate boýunça Aziýanyň açyk çempionatynda (Kuokushin AIKO Asian Open Championship) iki altyn medala mynasyp boldular.
Bäsleşige Türkmenistandan bu ýapon söweş sungatynyň iki ussady gatnaşdy. Ýazmuhammet Aşyrmyradow 80 kilograma çenli agram derejesinde altyn medal gazandy, 90 kilograma çenli agram derejesinde Myrat Ekäýew ýeňiji boldy. Iki türgen hem milli we halkara ýaryşlaryň birnäçe gezek ýeňijileridir.
Milli kýokuşinkaý karate merkeziniň ýolbaşçysy Atamyrat Hudaýberdiýewiň bellemegine görä, sportuň bu görnüşi Türkmenistanyň ýaşlarynyň arasynda meşhurdyr.
Aşgabat şäherindäki sport mekdebiniň uly tälimçisi hökmünde Hudaýberdiýew çagalary we ýetginjekleri kýokuşinkaý karate bilen meşgullanmaga çekýär. Bu sport görnüşiniň diňe söweş sungatydygy hakynda giňden ýaýran ynamyň bardygyna garamazdan, ol kýokuşinkaý karate bilen çagalaryň hem meşgullanyp biljekdigine ynanýar.
Koreý gelip çykyşly ýapon Masutasu Oýama tarapyndan esaslandyrylan kýokuşinkaý galtaşyk usulynyň gatylygy bilen tapawutlanýar. Galtaşyksyz mekdepleriň köpüsinden tapawutlylykda, bu görnüş boýunça galtaşykly tutluşyklarda urgularyň hakyky güýji doly görkezilýär. Oýamanyň özi bütin ömrüni bu sungaty kämilleşdirmäge bagyşlap, iň ýokary ussatlyga ýetdi.
