Şu ýylyň noýabr aýynyň 14 — 17-si aralygynda Magtymguly adyndaky Türkmen döwlet uniwersitetinde sanly ulgam arkaly Himiýa dersi boýunça II halkara internet olimpiadasyny geçirmek meýilleşdirilýär. Bu barada 31-nji awgustda sanly ulgam arkaly geçirilen Hökümet mejlisiniň barşynda wise-premýer N.Amannepesowyň hasabatynda aýdyldy.
Bellenilişi ýaly, bu olimpiada Arkadag Serdarly bagtyýar ýaşlar ýylynyň halkara ähmiýetli çäreleriniň birine öwrüler. Oňa Türkmenistanyň ýokary okuw mekdepleriniň talyplary, şeýle hem Russiýa Federasiýasynyň, ABŞ-nyň, Hytaý Halk Respublikasynyň, Italiýanyň, Rumyniýanyň, Täjigistanyň, Belarusuň, Özbegistanyň, Gazagystanyň hem-de beýleki döwletleriň ýokary okuw mekdeplerinde bilim alýan ýaşlar gatnaşarlar.
Prezident Serdar Berdimuhamedow hasabaty diňläp, şu ýylyň başyndan bäri ýurduň talyplarynyň halkara olimpiadalaryň birnäçesine üstünlikli gatnaşandyklaryny kanagatlanma bilen belledi we wise-premýere sanly ulgam arkaly himiýa dersi boýunça geçiriljek olimpiadanyň ýokary derejede guralmagy üçin ähli çäreleri görmegi tabşyrdy.
