Ozal hem habar berşimiz ýaly, 16-njy iýunda Türkmenistanyň futbol boýunça milli ýygyndysy 2018-nji ýylda Russiýa Federasiýasynda geçiriljek dünýä çempionatynyň toparçalaryna girmek üçin goňşy Eýran Yslam Respublikasynyň milli ýygyndysyny kabul eder. Duşuşyk ýerli wagt bilen sagat 18:00-da Daşoguz stadionynda geçiriler.
Türkmenistanyň at gazanan tälimçisi Amangylyç Goçumow bu duşuşyk üçin milli ýygyndymyza 28 futbolçyny çagyrdy. Guam bilen bolan duşuşykdan tapawutlylykda 16-njy iýunda daşary ýurtlaryň ligalarynda çykyş edýän ildeşlerimiz hem ýaşyl meýdana çykar. Häzirki bar bolan maglumatlara görä, milli ýygyndymyzyň düzümine çagyrylan 28 futbolçynyň 3-si derwezewan, 7-si goragçy, 11-si ýarym goragçy we 4-si hüjümçi. Ýygyndy toparymyzyň düzümine Ýokary liganyň geçen ýylky çempiony, Türkmenistanyň Aragatnaşyk ministrliginiň «Altyn asyr» topar iň köp goşant goşýar. Toparyň 7 futbolçysy ýygyndymyzyň düzümine çagyryldy.
Türkmenistanyň futbol taryhynda ilkinji gezek AFK-nyň Kubogynyň toparçalarynda çykyş etmäge hukuk gazanan «Ahalyň», Amangylyç Goçumowyň milli ýygyndy bilen ugurdaşlykda tälimçilik edýän topary — «Aşgabadyň» we şu ýyl ýene-de Ýokary ligada üstünlikli çykyş edýän «Balkanyň» her haýsyndan 3 oýunçy milli ýygyndymyza çagyryldy. Bulardan başga-da, HTTU-dan 2, «Hazynadan» bir futbolçy bar.
Her bir garşydaş üçin milli ýygyndymyza ýokary derejede taýýarlygyň gerekdigini, islendik pursatda islendik kynçylygyň ýüze çykyp biljekdigini Guam bilen bolan ilkinji duşuşyk görkezdi. Bary-ýogy 200 müňden gowrak ilatly dünýäniň iň bir kiçijik döwletleriniň birinden asgyn gelen milli ýygyndymyz üçin dünýä çempionatynda Argentina ýaly güýçli ýygynda mynasyp garşylyk görkezmegi, ýoldaşlyk duşuşyklarynda Çilini ýeňmegi başaran we FIFA-nyň reýtingi boýunça Aziýa döwletleriniň arasynda birinji basgançakda duran Eýranyň futbol ýygyndysy bilen ýaşyl meýdana çykmak üçin ýokary taýýarlygyň gerekdigi öz-özünden dünüklidir. Şonuň üçin hem daşary ýurtlarda çykyş edýän türkmenistanly futbolçylar hem ýygyndymyza çagyryldy.
Milli ýygyndymyzyň düzümine çagyrylan futbolçylaryň sanawy:
Derwezewanlar:
Nikita Gorbunow, «Ahal»
Sergeý Kusnesow, «Aşgabat»
Mämmet Orazmuhammedow, «Altyn asyr»
Goragçylar:
Myrat Hamraýew, «Ahal»
Rahymberdi Baltaýew, «Aşgabat»
Mekan Saparow, «Balkan»
Akmyrat Jumanazarow, HTTU
Şöhrat Söýünow, «Altyn asyr»
Serdar Annaorazow, «Altyn asyr»
Bahtiýar Hojaahmedow, «Altyn asyr»
Ýarym goragçylar:
Süleýman Orazow, «Ahal»
Ilýa Tamurkin, «Merw»
Ahmet Ataýew, «Altyn asyr»
Umidjan Astanow, «Altyn asyr»
Guwanç Abylow, «Hazyna»
Nazar Baýramow, HTTU
Amir Gurbany, «Balkan»
Serdar Geldiýew, «Altyn asyr»
Artur Geworkýan, «Nasaf» (Özbegistan)
Arslanmyrat Amanow, «Almalyk» (Özbegistan)
Ruslan Mingazow, «Ýablones» (Çehiýa)
Hüjümçiler:
Berdi Şamyradow, «Aşgabat»
Serdaraly Ataýew, «Balkan»
Altymyrat Annadurdyýew, «Ahal»
Süleýman Muhadow, «Altyn asyr»
Şu sanawdan hem görnüşi ýaly, baş tälimçi Amangylyç Goçumow derwezäni, esasan, tejribeli derwezewanlara ynanypdyr. Ýygyndymyzyň derwezewanlarynyň üçüsiniň hem baý tejribesi bar. Goragçylar hem Ýokary ligada ussatlygyny görkezýän oýunçylardan seçilip alnan. Ýöne düzümde gyraky goragçylara görä, merkezi goragçylar agdyklyk edýär.
Baş tälimçi ýarym goragçy meselelesinde jomartlyk edene meňzeýär. Milli ýygynda çagyrylan ýarymgoragçylaryň sany meýdana çykýan oýunçylaryň sanyna deň – 11 ýarymgoragçy. Şol sanda daşary ýurtlaryň ligalaryndan çagyrylyp getirilen ildeşlerimiziň hem üçüsi-de ýarymgoragçy. Tälimçi bilen ylalaşmak isleýäris. Çünki oýun, esasan, ýarymgoragçylaryň üsti bilen alnyp barylýar.
Milli ýygyndynyň hüjüm böleginde üýtgeşme ýok. Janköýerler ýene-de Süleýman Muhadowy esasy düzümde görseler gerek. Altymyrat Annadurdyýewiň ýene-de ikinji ýarymda oýna girmegine garaşyp bolar. Tälimçiniň Ýokary liganyň hut häzirki iň netijeli hüjümçisi Myrat Ýagşyýewi ýygynda çagyrmanlygy welin, entek hem janköýerleri haýran galdyrýar. Belki oýun güni bir üýtgeşme bolup biler.
Ýygyndynyň düzüminde tejribeli oýunçylar agdyklyk edýär. Hatda karýerasynyň ahyryna ýakynlap gelýän Nazar Baýramowa çenli milli ýygynda çagyrylypdyr. Ýöne fiziki taýýarlygy ozalkylaryça ýok Nazaryň ýygyndymyza goşup biljek goşandy barada belli bir zat aýtmak kyn. Her niçik hem bolsa Berdi Şamyradow, Myrat Hamraýew, Bahtiýar Hojaahmedow, Serdaraly Ataýew, Nikita Gorbunow ýaly ýaşy 30-dan geçen oýunçylaryň ýaşlara meýdanda ussatlyk bilen baş boljakdygyna ynanýarys.
Daşary ýurtlardan çagyrylan oýunçylardan tama uly. Olaryň üçüsi-de öz çykyş edýän ligalarynda hem şowly çykyş edýärler. Artur Geworkýan bolsa geçen möwsümde Özbegistanyň iň gowy futbolçysy diýip yglan edildi.
Elbetde, Guam bilen bolan duşuşyk milli ýygyndymyz üçin sapak bolandyr. Şeýle-de bolsa türkmen futbolçylarynyň ýeňiş gazanjakdygyna ynanmak kyn. Ýöne oglanlarymyz dünýä çempionatynda Aziýa wekilçilik eden ýygyndy bilen deňeçer oýun alyp barar diýip tama edýäris.
Goşmaça maglumatlar:
Türkmenistanyň futbol boýunça milli ýygyndysynyň soňky ýyllarda geçiren käbir duşuşyklarynyň netijeleri: (http://www.liveresult.ru)
11.06.2015, Guam 1:0 Türkmenistan
12.03.2012, Nepal 0:3 Türkmenistan
10.03.2012, Palestina 0:0 Türkmenistan
08.03.2012, Türkmenistan 3:1 Maldiw adalary
27.01.2012, Rumyniýa 4:0 Türkmenistan
28.07.2011, Indoneziýa 4:3 Türkmenistan
23.07.2011, Türkmenistan 1:1 Indoneziýa
18.04.2009, Türkmenistan 5:0 Filippinler
20.01.2009, Kuweýt 2:0 Türkmenistan
18.01.2009, Türkmenistan 1:5 Siriýa
Eýranyň futbol boýunça milli ýygyndysynyň soňky ýyllarda geçiren duşuşyklarynyň netijeleri: (http://www.liveresult.ru)
11.06.2015, Özbegistan 0:1 Eýran
31.03.2015, Şwesiýa 3:1Eýran
26.03.2015, Eýran 2:0 Çili
23.01.2015, Eýran 3:3 Yrak
19.01.2015, Eýran 1:0 BAE
19.01.2015, Eýran 1:0 OAE
15.01.2015, Katar 0:1 Eýran
11.01.2015, Eýran 2:0 Bahreýn
04.01.2015, Eýran 1:0 Yrak
18.11.2014, Eýran 1:0 Günorta Koreýa
1992-nji ýyldan bäri geçirilen Türkmenistan — Eýran duşuşyklarynyň netijeleri: (http://www.footballdatabase.eu)
16.06. 2015 Dünýä Kuboygynyň saýlama oýunlary. D toparça Türkmenistan ?— ? Eýran
25 . 11.1996 Ýoldaşlyk duşuşygy Eýran 0 — 1 Türkmenistan
28 .04.1996 Ýoldaşlyk duşuşygy Türkmenistan 1 — 0 Eýran
26.04.1996 Ýoldaşlyk duşuşygy Türkmenistan 1 — 1 Eýran
05.10.1994 Aziýa oýunlary, A toparça Eýran 1 — 1 Türkmenistan
14 June 1993 Friendlies Asia zone Iran 2 1 Turkmenistan
08 June 1993 Friendlies Asia zone Iran 2 1 Turkmenistan