Şu gün Türkmenistanyň futbol çempionatynyň 6-njy tapgyrynda «Altyn asyr» «Aşgabady» kabul etdi. Türkmen paýtagtyndaky «Nisa» stadionynda geçirilen duşuşyk «aragatnaşykçylaryň» 2:0 hasabyndaky ýeňşi bilen tamamlandy.
Hasaby ilki bolup 26-njy minutda goragçy Zafar Babajanow açdy. 78-nji minutda bolsa 11 metrlik jerime urgusyny dürs ýerine ýetiren hüjümçi Altymyrat Annadurdyýew toparynyň ýeňşini berkitdi.
«Altyn asyr» bu ýeňişden soň utugyny 12-ä çykaryp, ýaryş tertibinde ikinji orna göterildi. 3 utukly «Aşgabat» bolsa ýedinjilikde galdy.
Tapgyr 27-nji awgustda geçiriljek «Energetik» ― «Nebitçi», «Ahal» ― «Merw» we «Şagadam» ― «Köpetdag» duşuşyklary bilen tamamlanar.
