Türkmenistanyň futbol boýunça milli ýygyndysy FIFA-nyň täzelenen sanawynda 129-njy orny eýeleýär. 1107 utuk toplan milli ýygyndymyz sanawda Sudan bilen Litwanyň aralygynda ýerleşýär.
Umuman, milli ýygyndymyz 2019-njy ýylyň noýabr aýyndan bäri şu orundan üýtgemän gelýär. Muňa türkmen futbolçylarynyň soňky bir ýyyň içinde resmi ýa ýoldaşlyk duşuşyklaryny geçirmändigi sebäpdir. Mälim bolşy ýaly, Dünýä çempionaty ― 2022-niň saýlama duşuşyklary hem soňa süýşürildi.
Sanawyň başyny Belgiýanyň futbol ýygyndysy çekýär. Fransiýa ikinji, Braziliýa üçünji orunda. Öňdäkileriň bäşligini Angliýanyň we Portugaliýanyň ýygyndylary jemleýär.
Dünýä çempionaty ― 2022-däki bäsdeşlerimizden Koreýa Respublikasy 38-nji, Liwan 91-nji, KHDR 115-nji, Şri-Lanka bolsa 206-njy orunda.
Sanaw indiki gezek 26-njy noýabrda täzelener.