Aziýa çempionaty – 2020-niň saýlama tapgyryna taýýarlygynyň çäginde Türkmenistanyň ýaşlar (U-19) ýygyndysy saýlama tapgyryň geçirilýän ýeri Kataryň Doha şäherinde 4 günlük okuw-türgenleşik ýygnanyşygyny geçirer ― diýip, Türkmenistanyň Futbol federasiýasynyň resmi saýty habar berýär.
Aziz Kambarowyň tälim berýän ýaşlar ýygyndymyzyň (U-19) okuw-türgenleşigi 1-4-nji noýabr aralygynda dowam eder. Ýygyndy toparymyzyň tälimçiler düzümi saýlama tapgyra ýerli toparlarymyzyň oýunçylarynyň 23-sini (Abdyllaýew Ybraýym, Ahallyýew Rüstem, Annaýew Ödemyrat, Borjakow Aly, Çopanow Resul, Goşşanow Silapberdi, Ylýasow Röwşenmyrat, Hydyrow Şamämmet, Matweýew Faruh, Myradow Begençmyrat, Myratberdiýew Rahman, Nurmetow Ahmet, Öräýew Amanmuhammet, Raimbaýew Serdar, Rozyýew Nurmyrat, Röwşenmyradow Resul, Röwşenow Serdar, Priýew Ruslan, Sakaýew Erik, Sekow Igor, Taýirow Timur, Toýjanow Yhlas, Umarow Salim) çagyrypdyrlar.
Ýygyndy toparymyz okuw-türgenleşiginiň yzysüresi 4 ― 10-njy noýabr aralygynda Dohada geçiriljek Aziýanyň çempionatynyň saýlama tapgyryna gatnaşar.
Ýeri gelende bellesek, 2020-nji ýylda geçiriljek Aziýa çempionatynyň saýlama tapgyrynyň «B» toparçasynda çykyş edýän ýaşlar ýygyndymyzyň garşydaşlary Kataryň, Ýemeniň hem-de Şri-Lankanyň ýygyndylary bolarlar. Saýlama tapgyry şu ýylyň 4 ― 10-njy noýabry aralygynda Kataryň paýtagty Doha şäherinde geçiriler.
Saýlama tapgyryň geçiş tertibi
06.11.2019.
17:10 Katar – Şri-Lanka ( «Abdullah Bin Halifa» stadiony, Doha)
15:10 Ýemen – TÜRKMENISTAN ( «Suheim Bin Hamad» stadiony, Doha)
08.11.2019.
15:10 Şri-Lanka – Ýemen ( «Suheim Bin Hamad» stadiony, Doha)
17:10 TÜRKMENISTAN – Katar ( «Abdullah Bin Halifa» stadiony, Doha)
10.11.2019.
17:10 Katar – Ýemen ( «Abdullah Bin Halifa» stadiony, Doha)
15:10 TÜRKMENISTAN – Şri-Lanka ( «Suheim Bin Hamad» stadiony, Doha)
Bellik: Duşuşyklaryň başlanýan wagtlary Aşgabat wagty bilen görkezilen.
