Paýtagtyň «Altyn asyrynyň» we Türkmenistanyň milli ýygyndysynyň 24 ýaşly goragçysy «Türkmenistanyň futbol çempionatynyň 2016-njy ýyldaky iň gowy futbolçysy» diýen ada mynasyp boldy. Bu at oňa Türkmenistanyň Futbol federasiýasy tarapyndan futbol hünärmenleriniň we sport žurnalistleriniň beren sesleri esasynda berildi.
Türkmenistanyň Futbol federasiýasyndan Turkmenportala berlen maglumata görä, ses berlişige geçen möwsümde milli çempionatymyzyň Ýokary ligasynda çykyş eden 9 toparyň tälimçileri we 9 sany žurnalist gatnaşdy. Ses berlişigiň netijesinde 29 utuk toplan Şöhrat Söýünow birinji, «Balkanyň» we milli ýygyndymyzyň goragçysy Mekan Saparow ikinji, geçen möwsümde derwezelere geçiren 30 pökgüsi bilen çempionatda iň kän tapawutlanan futbolçy bolmagy başaran Süleýman Muhadow üçünji orna mynasyp boldy. Ses berlişikde oňa gatnaşyjylar tarapyndan jemi 17 futbolçynyň ady görkezildi.
Şöhrat Söýünow bu derejä birinji gezek mynasyp bolýar. Professional futbola paýtagtyň HTTU toparynyň düzüminde girişen goragçy 2014-nji ýylda bu topar bilen AFK-nyň Prezidentiniň kubogyny gazandy. 2015-nji ýyldan bäri «Altyn asyryň» düzüminde yzygiderli çykyş edýän Ş.Söýünow topary bilen geçen möwsümde 3 kubogy — nobatdaky gezek Türkmenistanyň çempionlygyny, ýurdumyzyň kubogyny we Naýbaşy kubogyny gazandy.
Ş.Söýünow 2011-nji ýylyň 23-nji martynda Türkmenistanyň milli ýygyndysynyň düzüminde AFK-nyň Çagyryş kubogynda Taýwanyň ýygyndysy bilen geçirilen duşuşykda ýaşyl meýdana çykdy. Şol ýyl türkmen futbolçylary bu ýaryşyň final duşuşygyna çenli üstünlikli barmagy başardy. 2013-nji ýylda Arkalaşygyň kubogynda hem milli ýygyndymyzyň hatarynda çykyş eden goragçynyň türkmen futbolçylarynyň Aziýa kubogy — 2019-yň nobatdaky saýlama tapgyryna gatnaşmaga hukuk gazanmagynda hem goşandy uludyr.
