Aşgabatdaky Gyşky oýunlar sport toplumynda Täze ýyl baýramçylygy mynasybetli ýurduň we daşary ýurtlaryň belli estrada aýdymçylarynyň konsertlerine badalga berildi. Ilkinji konsertiň maksatnamasynyň aglaba bölegini eýranly türkmen aýdymçysy Emin Raseniň, Türkmenistanyň at gazanan artistleri Nurýagdy Rejebowyň we Ahmet Atajanowyň, şeýle-de Annaberdi Orazmämmedowyň aýdymlary düzdi. Bu barada «Türkmenistan» gazetinde habar berildi.
Eýranly estrada aýdymçysy Emin Rasen dabaranyň başynda ata Watany Türkmenistanda konsert bermegiň özi üçin uly hormatdygyny aýtdy. Onuň «Serkerde», «Turan», «Gaýgy etme» ýaly aýdymlary tomaşaçylarda watançylyk, mertlik, aslyňa buýsanmak ýaly belent duýgulary oýarmak bilen, aýratyn ruhubelentlik bagyşlady.
Eýranly türkmen aýdymçysynyň Annaberdi Orazmämmedow bilen bilelikde ýerine ýetiren «Türkmenistan» we «Magtymguludyr» atly aýdymlary «Pähim-paýhas ummany Magtymguly Pyragy» şygary astynda geçýän şu ýylyň ajaýyp üstünlikleriniň waspnamasy bolup ýaňlandy. Ol Ahmet Atajanow bilen bilelikde «Watannama» atly aýdymy hem ýerine ýetirdi.
Eýranly aýdymçynyň «Tans oýnalyň», «Başyňy yrama», «Eller ýokary» atly aýdymlaryny dabara gatnaşyjylar aýratyn şowhun bilen garşyladylar. Türkmenistanyň Döwlet tans toparynyň tansly çykyşlary-da sahna özboluşly bezeg berdi.
Ýeri gelende bellesek, Emin Rasen rep aýdymlary bilen giňden tanalýar. Onuň «Gandi», «Drakula», «Pozitiw» ýaly aýdymlary üýtgeşik şahyrana stili, pikir aňlatmalary bilen tapawutlanýar. Onuň türkmen aýdymçylary bilen bilelikde ýerine ýetiren çykyşlary aýdym-saz sungatynyň täze eserleri hökmünde tomaşaçylar üçin Täze ýyl sowgady boldy. Şolaryň biri-de Emin Raseniň we Süleýman Uşakowyň bilelikde ýerine ýetiren «Bereket» atly aýdymydyr. Şeýle hem Nurýagdy Rejebowyň «Dünýä», «Näzlije», «Söýgülim» atly aýdymlary sungat muşdaklarynyň şowhunly el çarpyşmalaryna mynasyp boldy.
Çykyş eden ähli sungat ussatlarynyň uly joşgun bilen ýerine ýetiren «Arkadagly Serdarym» atly aýdymy dabaranyň ajaýyp jemlenmesine öwrüldi diýlip, habarda bellenilýär.
Gyşky oýunlar sport toplumynda daşary ýurtlaryň belli estrada ussatlarynyň gatnaşmagynda geçirilýän Täze ýyl baýramçylyk konsertleri 28-nji dekabra çenli dowam eder. Özbegistanly sungat ussady Osman Nowruzowyň, russiýaly belli aýdymçylar Olga Şultaýsyň, Arsen Şahunsyň, türkiýeli estrada ýyldyzlary Murat Bozuň, Gülşen Baýraktaryň, tunisli aýdymçy Amani Swissiniň şowhunly çykyşlary Aşgabadyň ýaşaýjylary we myhmanhanlary üçin ajaýyp Täze ýyl sowgadyna öwrüler.
