Türkmen boksçulary Bangkokda geçirilýän ikinji Bütindünýä Olimpiýa oýunlaryna saýlama ýaryşynda ilkinji ýeňşini gazandylar. Türkmen döwlet bedenterbiýe we sport institutynyň 5-nji ýyl talyby Şükür Öwezow şeýle üstünlige ýetdi.
Hançžouda (Hytaý) geçirilen ХIХ tomusky Aziýa oýunlaryna gatnaşan, 63 boksçynyň medallar ugrunda göreşýän 57 kilograma çenli agram derejesinde 22 ýaşly Saud Arabystanyndan Ziýad Ali Majraşi bilen tutluşanda ildeşimiz aňsatlyk bilen ýeňdi. Eminleriň ählisi biragyzdan ýeňşi Şükür Öwezowa berdiler. Netijede Şükür Öwezow 5:0 hasabynda ýeňiş gazanyp, 1/16 finala çykdy, şonda 52 kilograma çenli agram derejesinde Tokioda geçirilen Olimpiýa oýunlarynyň 25 ýaşly kümüş medalynyň eýesi we 2018-nji ýylda geçirilen XVIII tomusky Aziýa oýunlarynyň bürünç medalynyň eýesi, 54 kilograma çenli agram derejesinde Aziýanyň çempiony, ilkinji duşuşygynda Alekseý Lagkazaşwiliden (Gresiýa) 5:0 hasabynda üstün çykan Karlo Paalam (Filippinler) bilen duşuşar.
Bangkokda geçirilýän ikinji Bütindünýä Olimpiýa oýunlaryna saýlama ýaryşy boksçular üçin 2024-nji ýylda Parižde geçiriljek Olimpiýa oýunlaryna gatnaşmak üçin iň soňky mümkinçilikdir.
Bu saýlama ýaryşynda Türkmenistanyň milli ýygyndysyna üç türgen wekilçilik edýär. Şükür Öwezowdan başga-da, Saparmyrat Ödäýew (63,5 kilograma çenli) we Baýramdurdy Nurmuhammedow (71 kilograma çenli) 2024-nji ýylda Parižde geçiriljek Olimpiýa oýunlaryna gatnaşmaga hukuk gazanmak ugrunda göreşýärler.
Bijä görä, Saparmyrat Ödäýew (63,5 kilograma çenli) ilkinji tutluşykda Kong Çin Li (Gonkong) bilen duşuşar. Bu duşuşykda ýeňiş gazansa ol indiki tapgyrda Wu Tan Dat (Wýetnam) – Sendbaatar Erdenebat (Mongoliýa) bilen duşuşar.
Hançžouda (Hytaý) geçirilen ХIХ tomusky Aziýa oýunlarynyň bürünç medalynyň eýesi Baýramdurdy Nurmuhammedow 2022-nji ýyldaky Aziýa çempionatynyň 27 ýaşly bürünç medalynyň eýesi Byamba-Erdene Otgonbaatar (Mongoliýa) bilen tutluşar. Onuň ýeňijisi ýaryşyň ikinji tapgyrynda Nişant Dew (Hindistan) – Armando Bigafa Bigate Naae (Gwineýa-Bisau) tutluşygynyň ýeňijisi bilen duşuşar.
