Özbegistanyň Horezm welaýatynyň Şabat etrabynda «Özbegistan — Türkmenistan» erkin söwda zolagy dörediler. Bu barada «Uzdaily.uz» habar berdi.
Özbegistanyň Prezidenti Şawkat Mirziýoýew şu gün — 29-njy fewralda Horezm welaýatyna amala aşyran iş saparynyň çäklerinde sebitde durmuşa geçirilmegi göz öňünde tutulýan birnäçe taslamalar boýunça degişli resminamalara gol çekdi. Hususan-da, Özbegistanyň Prezidenti Şawkat Mirziýoýew «Özbegistan — Türkmenistan» erkin söwda zolagyny döretmek baradaky Karara hem gol çekdi.
Resminama laýyklykda, bu erkin söwda zolagy harytlary saklamak, sortlamak, marketing, daşamak we beýleki häzirki zaman hyzmatlary üçin infrastrukturany guramak üçin döredilýär. Söwda zolagynda diňe Türkmenistanda we Özbegistanda öndürilen harytlar alyjylara ýetiriler. Şeýle-de bu ýerde gümrük gulluklary hem bölek söwda amallaryna rugsat berilýän «erkin gümrük zolagy» düzgüni boýunça iş alyp barar.
Mundan başga-da, erkin söwda zolagyň içindäki adamlaryň, ulaglaryň we harytlaryň erkin hereketi üpjün ediler. Onuň çägindäki binalar we desgalar onlaýn auksionlar esasynda işewürlere berler.
