Fransiýa Respublikasynyň «Arterail» kompaniýasynyň esaslandyryjysy we baştutany Žerom Garsýanyň ýolbaşçylygynda bu kompaniýanyň hünärmenleri bilen «Türkmendemirýollary» agentliginiň hünärmenleriniň arasynda wideoaragatnaşyk arkaly duşuşyk boldy. Duşuşyga Türkmenistanyň Fransiýa Respublikasyndaky ilçihanasynyň ýolbaşçysy we işgärleri hem gatnaşdylar. Bu barada Türkmenistanyň Ministrler Kabinetiniň ýanyndaky Ulag we kommunikasiýalar agentligi resmi saýtynda habar berildi.
22-nji fewralda bolan duşuşygyň dowamynda türkmen demirýolçulary ýurduň demirýol infrastruktura taslamalary, demirýol pudagyny döwrebaplaşdyrmak we elektrikleşdirmek boýunça hyzmatdaşlyk meseleleri bilen fransuz hünärmenlerini tanyşdyrdylar. Fransiýaly hünärmenler Türkmenistanyň demirýol ulaglary edarasy bilen özara bähbitli hyzmatdaşlygy ýola goýmaga gyzyklanma bilidirýändiklerini we bar bolan taslamalara gatnaşyp, ýurduň ykdysadyýetine öz saldamly goşantlaryny goşmagy maksat edinýändiklerini beýan etdiler.
Habarda bellenilişi ýaly, türkmen tarapy öz gezeginde fransiýaly kärdeşlerini Türkmenistan bilen, demirýol ulaglary pudagynda alnyp barylýan işler bilen ýakyndan tanyşyp, ýerinde hyzmatdaşlygy ösdürmek meselelerini ara alyp maslahatlaşmak üçin Fransiýa Respublikasynyň «Arterail» kompaniýasynyň wekiliýetini Türkmenistana gelmäge çagyrdy.
Türkmen demirýolçulary öz gezeklerinde demirýol ulaglary pudagynda türkmen-fransuz hyzmatdaşlygyny ýola goýmak bilen baglylykda Özara düşünişmek hakynda Ähtnama göl çekişmek üçin resminamanyň taslamasyny taýýarlap, bellenen tertipde ylalaşmak üçin diplomatik ýollar arkaly iberilmegi teklip berildi.
Duşuşyk däbe öwrülen dostlukly gatnaşyklary esasynda işewürlik we işjeň ýagdaýynda geçdi diýlip, habarda bellenilýär.
