Türkmenistan Gyrgyzystana 2 müň tonna suwuklandyrylan tebigy gaz iberdi, Serdar Berdimuhamedow diplomatik gatnaşyklaryň ýola goýulmagynyň 30 ýyllygy mynasybetli Laosyň Prezidentini gutlady, türkmen talyplary Malaýziýada geçirilen halkara medeni agşamda baýraga mynasyp boldular we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Buýruga gol çekdi. Resminama laýyklykda, «Türkmengaz» döwlet konserni 2000 tonna möçberdäki suwuklandyrylan gazy dost-doganlyk kömegi hökmünde Gyrgyz Respublikasyna muzdsuz iberer. Bu çözgüt Gyrgyz Respublikasynyň energetika ulgamynda ýüze çykan çylşyrymly ýagdaýlar nazara alnyp kabul edildi. Ynsanperwer ýüki ibermek üçin 53 sany demirýol sisternasy taýýarlanyldy. Suwuklandyrylan tebigy gazyň iberilmegi iki ýurduň arasyndaky dostlukly gatnaşyklaryň pugtalandyrylýandygynyň we türkmen halkynyň ynsanperwer däpleriniň dowam etdirilýändiginiň subutnamasyna öwrüldi.
2. Türkmenistanyň Prezidenti Serdar Berdimuhamedow Laos Halk Demokratik Respublikasynyň Prezidentine we ýurduň ähli halkyna iki ýurduň arasynda diplomatik gatnaşyklaryň ýola goýulmagynyň 30 ýyllygy mynasybetli tüýs ýürekden gutlaglaryny hem-de iň gowy arzuwlaryny iberdi. Prezident Serdar Berdimuhamedow Türkmenistan bilen Laosyň arasyndaky gatnaşyklaryň birek-birege hormat goýmak, deňhukuklylyk, ynanyşmak ýörelgelerine esaslanýandygyny belläp, Türkmenistanyň ikitaraplaýyn hyzmatdaşlygy giňeltmäge gyzyklanma bildirýändigini nygtady hem-de bilelikdäki tagallalaryň netijesinde halklaryň ikisiniň hem bähbidine halkara hyzmatdaşlygynyň mundan beýläk-de ösdüriljekdigine ynam bildirdi.
3. Türkmen talyplary Kuala-Lumpurda geçirilen «UNITEN halkara medeniýet agşamy» çäresinde milli küştdepdi tansyny ýerine ýetirip, baýraa mynasyp boldular diýip, Türkmenistanyň Malaýziýadaky ilçihanasy habar berýär. «UNITEN International Culture Night» – bu Halkara talyplar temgyýeti tarapyndan her ýylda gulaýna medeni çäredir. Bu köpdürlülik we zehin bäsleşiginde dürli ýurtlardan gelen talyplar milli egin-eşiklerini, tanslaryny, aýdymlaryny, teatr çykyşlaryny we beýleki medeni aýratynlyklaryny tanyşdyryp çykyş edýärler.
4. Türkmenistanyň Gahrymany, kosmonawtlar toparynyň serkerdesi Oleg Kononenko orbitada bolmagyň umumy wagty boýunça rekord goýup, adyny kosmonawtikanyň taryhyna ýazdyrdy. Ol kosmosda 878 günden gowrak wagt geçiren Gennadiý Padalkanyň üstünliginden hem öňe geçdi. Oleg Kononenkonyň täze üstünligi Ýeriň orbitasynda 1000 gün bolmakdyr. Iýun aýynda ol orbitada 60 ýaşyny bellär, bir ýyllap dowam eden ekspedisiýanyň ahyryna çenli bolsa onuň rekordy has-da uly bolar. Häzirki wagtda Kononenko karýerasyndaky bäşinji kosmos uçuşyny amala aşyrýar.
5. Moskwada her ýylda geçirilmegi däp bolan Russiýanyň daşary işler ministri Sergeý Lawrowyň GDA ýurtlarynyň ilçileri bilen duşuşygy geçirildi. Oňa Türkmenistanyň Russiýa Federasiýasyndaky ilçisi Esen Aýdogdyýew hem gatnaşdy. Çäräniň maksady 2023-nji ýylda Arkalaşygyň çägindäki hyzmatdaşlygyň jemini jemlemekden we geljek üçin meýilnamalara garamakdan ybaratdyr.
6. Türkmenistanyň Koreýa Respublikasyndaky ilçihanasynyň binasynda 2024-nji ýylyň «Pähim-paýhas ummany Magtymguly Pyragy» ýyly diýlip yglan edilmegine hem-de Türkmenistanyň Prezidenti Serdar Berdimuhammedowyň «Ýaşlar — Watanyň daýanjy» atly ilkinji kitabynyň tanyşdyrylyş dabarasyna bagyşlanan duşuşyk geçirildi. Duşuşyga Koreýa Respublikasynda okaýan türkmen talyplary gatnaşdylar. Türkmenistanyň ilçisi Begenç Durdyýew çärede eden çykyşynda Magtymguly Pyragynyň döredijilik mirasynyň uly ähmiýeti barada belledi. Şeýle-de ýaş nesli terbiýelemekde gymmatly gollanma bolan Türkmenistanyň Prezidentiniň kitaby tanyşdyryldy.
Dünýäde
7. Pensilwaniýa ştatynyň Panksatoni şäherinde möhüm waka – Surok güni geçirildi. Meşhur Fil atly surok (gemiriji) amerikalylara ýakyn wagtda ýyly howanyň geljekdigini habar bedi. Däp bolşy ýaly, baýramçylyga gatnaşyjylar Filiň oýanmagyna şaýat bolmak üçin Gobblerz-Nob tokaýyna ýygnandylar. Eger ol hininden çykyp, kölegesinden gorksa, bu gyşyň ýene alty hepde dowam etjekdigini aňladýar. Ýöne hemmeleri begendiren waka boldy – ol kölegesini görmedi, bu bolsa ýazyň iň geljekdigini aňladýar.
8. «Vogue» žurnaly 2024-nji ýylyň trend reňkler toplumyny tanyşdyrdy, olar açyk reňkleri gowy görýänleri we asuda nusgawy reňkleri halaýanlary begendirer. Gök, gyzyl we mämişi – bu üç reňk ýazyň we tomsuň hakyky hit reňkleri bolar. Çal reňk, açyk öwüşginler we pastel reňkler has çäklendirilen reňk sazlaşygyny gowy görýänler üçin niýetlenýär. Açyk reňkli, özüne çekiji esbaplar islendik keşbe gözellik goşar.
9. ABŞ-ly biologlar hakyky açyş etdiler: olara taryhda ilkinji gezek 3D çap enjamynda hakykysy ýaly ösmäge we işlemäge ukyply adam beýni dokumalaryny döretmek başartdy. Adaty 3D çap usullaryndan, ýagny keseligine üsti-üstüne çap etmekden tapawutlylykda, alymlar bu ýagdaýda materiallaryň gatlaklaryny biri-birine dikligine birikdirmek usulyndan peýdalandylar. Beýni öýjükleri stoluň üstündäki galamlar ýaly, gapdallygyna ýerleşdirildi. Zerur bolan gurluşy we neýron aragatnaşygyny üpjün etmek üçin ýörite ýumşak gel ulanyldy.
Sport habarlary
10. Aşgabatda çagalar futbolynyň festiwaly geçirildi. Oňa 10-12 ýaş aralygyndaky 100 töweregi çaga gatnaşdy. Futbol festiwaly futboluň esasy tehniki elementlerine esaslanýan oýun maşklary görnüşinde geçirildi. Meýdançada birnäçe bölüm ýerleşdirildi, olaryň her birinde çagalar dürli maşklary ýerine ýetiridiler, derwezä urgy geçirdiler we ýaryşlara gatnaşdylar. Çagalar ähli oýunlara işjeň gatnaşdylar. Festiwalyň maksady ýurtda futboluň meşhurlygyny artdyrmakdan ybaratdyr.
