«Turkmenportalyň» nobatdaky işewürlik-daýjestinde Türkmenistanyň geçen hepdedäki esasy ykdysady wakalary barada okap bilersiňiz.
Gün tertibine Ýurduň 2024-nji ýyl üçin maýa goýum maksatnamasy, senagatda we oba hojalygynda täze önümçilik desgalaryny işe girizmegiň meýilnamalary, 2023-nji ýylyň netijeleri boýunça nebit öndürýän kompaniýalaryň we deňiz söwda flotunyň rekord görkezijileri girizildi.
Şeýle hem hepdelik synyň bu sany Türkmenistan bilen Eýranyň arasynda energetika hyzmatdaşlygynyň giňeldilmegi, ýurtlaryň arasyndaky ýük daşamalarynyň ýeňilleşdirilmegi we Russiýa oba hojalyk önümleriniň eksportynyň artdyrylmagy baradaky habarlary öz içine alýar.
Türkmenistanyň 2024-nji ýyl üçin maýa goýum maksatnamasy
Resminamada iri infrastruktura taslamalarynyň – strategik ähmiýe eýe bolan TOPH gaz geçirijisiniň, Balkan welaýatynda täze Halkara howa menziliniň, kuwwaty 1574 megawat bolan, utgaşykly dolanyşykda işleýän elektrik stansiýasynyň gurluşyklaryny dowam etdirmek göz öňünde tutulýar.
Şeýle hem Aşgabat — Türkmenabat ýokary tizlikli awtomobil ýolunyň, Garabogazköl aýlagynyň üstünden geçýän köpriniň gurluşygynyň taslamalaryny durmuşa geçirmek göz öňünde tutulýar. Sebitde ilkinji innowasion «akylly şäher» bolan Arkadag şäheriniň ikinji tapgyrynyň gurluşyklary durmuşa geçiriler.
Mundan başga-da, köp mukdarda maýa goýumlar durmuş maksatly desgalaryň, şol sanda ýaşaýyş jaýlarynyň, saglygy goraýyş desgalarynyň, orta mekdepleriň we çagalar baglarynyň, awtomobil ýollarynyň hem-de inženerçilik ulgamlarynyň gurluşygyna gönükdiriler.
Senagat
Türkmenistanyň Senagat we gurluşyk önümçiligi ministrligi demir garyndyly önümleri öndürýän kärhanany gurmak mümkinçiligini öwrenýär. Täze kärhanada ferrosiliýa, kremniý karbidi we tehniki kremniý ýaly uly islegden peýdalanýan materiallary öndürmek göz öňünde tutulýar.
Şonuň bilen birlikde, Türkmenistanyň Senagat ministrligi ýylylyk we ses izolýasiýa plitalaryny hem-de matalary, şeýle hem üznüksiz süýümleri öndürýän zawodyň gurluşygynyň taslamasyny bahalandyrýar. Zawody Balkan welaýatynyň Jebel şäherçesinde gurmak meýilleşdirilýär.
Ýangyç-energetika toplumy
Eýranyň nebit ministri Jawad Owji sapar bilen Türkmenistana geldi. Prezident Serdar Berdimuhamedow bilen geçirilen duşuşykda iki ýurduň nebitgaz ulgamynyň hünärmenleriniň hyzmatdaşlygyň täze görnüşlerini we usullaryny gözlejekdikleri bellenildi. Türkmenistanyň Daşary işler ministrliginiň ýolbaşçysy bilen geçirilen gepleşikleriň dowamynda energetika edaralarynyň arasynda gatnaşyklary giňeltmäge bolan gyzyklanma beýan edildi.
Türkmenbaşynyň nebiti gaýtadan işleýän zawodlar toplumy 2023-nji ýylda türkmen sarp edijilerine 2 million 760 müň tonna, eksport üçin bolsa 1,3 million tonna nebit önümlerini iberdi. Bu toplumda benziniň dürli görnüşleri, kerosin, dizel ýangyjy, mazut, motor ýaglary, polipropilen, ýyladyjylar üçin ýangyç, koks, suwuklandyrylan gaz we köp sanly beýleki nebit önümleri öndürildi.
Ýük daşamalary
Türkmenistanyň we Eýranyň gümrük edaralary «Artyk — Lotfabad» geçelgesinden awtoulagly ýük daşamalarynyň mümkinçiliklerini artdyrmagyň meselelerini ara alyp maslahatlaşdylar. Duşuşykda ýük daşamalary boýunça amallary ýeňilleşdirmek, hususan-da, ygtyýarly işgärleriň iş wagtyny köpeltmek, ýük ulaglarynyň sürüjilerine wizany ýeňilleşdirilen tertipde resmileşdirmek hem-de barlag wagtyny azaltmak meseleleri maslahatlaşyldy.
2023-nji ýylda «Deňiz söwda floty» ÝGPJ Hazar deňziniň daşary ýurt portlaryna we öz hasaba alnan portuna 2 million tonnadan gowrak ýük daşady. Olaryň hatarynda nebit önümleri, gurluşyk materiallary, dökünler, däne, konteýnerler, ürgün ýükleri hem-de beýleki ýerli we üstaşyr ýükler bar.
Söwda
Oba hojalygy
2024-nji ýylyň başyndan bäri Türkmenistan Moskwa oblastyna 2 müň tonna ter pomidor iberdi we Russiýany bu önüm bilen üpjün edijileriň iň irileriniň biri hökmündäki derejesini berkitdi. Türkmen pomidorlary ýüklenen 116 awtoulag fitosanitar barlagyny üstünlikli geçdi.
