Şu günler Aşgabatda Türkmenistanyň Stol tennisi federasiýasynyň guramagynda ykjam okuw-türgenleşik ýygnanyşygy alnyp barylýar. Federasiýa bu ähmiýetli çäräni Türkmenistanyň Bedenterbiýe we sport baradaky döwlet komitetiniň hem-de Halkara Stol tennisi federasiýasynyň (ITTF) ýardamy esasynda gurady. Şeýlelikde, bu ýerde Halkara Stol tennisi federasiýasynyň halkara bilermeni, Gazagystanyň at gazanan tälimçisi hem-de ýaşlar ýygyndysynyň uly tälimçisi Ýewgeniý Timçenkonyň ýolbaşçylygynda stol tennisi boýunça ykjam türgenleşikler geçilýär.
Ýeri gelende bellesek, şu ýylyň tomsunda Tailandyň Bangkok şäherinde geçirilen Halkara Stol tennisi federasiýasynyň sammitine Türkmenistanyň Stol tennisi federasiýasynyň ýolbaşçysy Agamyrat Allanazarow hem gatnaşypdy. Şol ýerde guralan ara alnyp maslahatlaşmalaryň esasynda bolsa dünýäde sportuň şu görnüşini ösdürmek boýunça maksatnamalaryň çäklerinde 5 — 14-nji dekabrda Aşgabatda okuw-türgenleşik ýygnanyşygyny guramak barada ylalaşylypdy. Mahlasy, bu möhüm çäre ITTF-iň stol tennisiniň ösüşini, meşhurlygyny artyrmaga, bu görnüşden täze zehinleri kesgitlemäge, türgenleşikleri we bäsleşikleriň geçirilişini içgin öwretmäge gönükdirilen «Gatnaşy Maksatnamasy» boýunça amal edilýär.
Her gün 3 wagtyna 3 setde geçirilýän taýýarlyk işleri ykbalyny sportuň şu görnüşine bagyşlan ýaşlarymyzyň kämilleşmeginde diýseň möhüm ähmiýete eýedir. Şol sebäpden hem, bu okuw-türgenleşik ýygnanyşygyna Aşgabat, Mary, Türkmenabat, Seýdi hem-de Farap şäherlerinden bolan 60 töweregi türgen hem-de 12 tälimçi gatnaşýar.
— ITTF-iň howandarlygynda geçýän okuw-türgenleşik ýygnanyşygynyň diýseň çuň mazmuny bilen tapawutlanýandygyny bellemek gerek. Munuň özi stol tennisiniň gelejegini nazarlaýan ähmiýetli ädimdir. Türkmenistanda halkara derejeli bilermeniň ykjam türgenleşik geçmegi üçin ähli şert-mümkinçilikler döredildi. Şeýlelikde, tejribeli hünärmen 5-nji dekabrdan bäri ýokary derejedäki işleri alyp barýar. Bu ýerde türgenler üçin geçilýän okuw-türgenleşikler bilen birlikde, tälimçileriň hünär derejesini ýokarlandyrmak boýunça hem aýratynlykdaky işler amala aşyrylýar. Şeýle ädimler stol tennisi boýunça milli mekdebimiziň sazlaşykly ösüşini şertlendirer — diýip, Türkmenistanyň Stol tennisi federasiýasynyň ýolbaşçysy Agamyrat Allanazarow belleýär.
Tejribeli bilermen Ýewgeniý Timçenko bolsa sport ýurdy hökmünde uly meşhurlykdan peýdalanýan Türkmenistanda stol tennisini ösdürmek, bu ugurda ýaş zehinleri ýüze çykarmak üçin zerur mümkinçilikleriň ählisiniň üpjün edilendigini nygtady.
Ýewgeniý Timçenkonyň stol tennisi boýunça boýunça alyp barýan okuw-türgenleşik ýygnanyşygy 14-nji dekabrda tamamlanar.
