Türkmenistanyň DIM-inde Türkmenistanyň daşary işler ministriniň orunbasary M.Bäşimowa bilen Migrasiýa boýunça halkara guramanyň (MHG) Merkezi Aziýa boýunça sebitleýin utgaşdyryjysy Zeýnal Gajiýewiň arasynda gepleşikler geçirildi.
7-nji martda geçirilen gepleşikleriň barşynda taraplar «2022-nji ýylda Türkmenistanda Migrasiýa boýunça halkara guramasynyň wekilhanasy bilen bilelikde Türkmenistanyň Hökümeti tarapyndan durmuşa geçirilmegi meýilleşdirilýän taslamalaryň Meýilnamasynyň» üstünlikli durmuşa geçirilişini kanagatlanma bilen bellediler.
2023-nji ýylda ýerine ýetirilmeli işleriň Meýilnamasyny ara alyp maslahatlaşmagyň çäginde Türkmenistanyň Hökümetiniň we MHG-nyň bilelikdäki taslamalaryny ýakyn wagtda durmuşa geçirmek meselelerine garaldy. Adam söwdasyna garşy göreş we migrantlara kömek, şeýle-de tehniki hyzmatdaşlyk hem-de serhet dolandyryşy ileri tutulýan ugurlar hökmünde kesgitlenildi.
Mundan başga-da, duşuşykda hyzmatdaşlygyň hukuk binýadyny täzelemek meseleleri ara alnyp maslahatlaşyldy.