Şu ýylyň 11 — 14-nji oktýabry aralygynda Lebap welaýatynyň Türkmenabat şäherinde «Senetçilik we amaly-haşam sungaty dünýä halklarynyň mirasynda» atly halkara festiwal geçiriler. «Watan» habarlar gepleşiginde aýdylyşy ýaly, 13-nji iýuldaky Hökümet mejlisinde wise-premýer M.Mämmedowa döwlet Baştutanyna festiwalyň guramaçylyk meseleleri barada hasabat berdi.
Häzirki wagtda halkara festiwalyň Düzgünnamasy işlenip taýýarlanyldy. Festiwalyň çäklerinde halk senetçiliginiň we amaly-haşam sungatynyň dürli ugurlary boýunça sergi-ýarmarkalary guramak, ussatlyk sapaklaryny, ylmy-amaly maslahatlary we beýleki çäreleri geçirmek göz öňünde tutulýar.
Hormatly Prezident Serdar Berdimuhamedow agzalan mejlisde halkara festiwaly bellenilen möhletlerde geçirmek baradaky teklibi makullap, wise-premýere bu çäräni ýokary derejede guramak boýunça anyk tabşyryklary berdi.
