Türkmenistanyň Senagatçylar we telekeçiler birleşmesiniň agzasy, telekeçi Şanazar Ýarjanow Aşgabat şäheriniň Berkararlyk etrabynyň çäginde ýerleşýän önümçilik kärhanasynda polipropilenden gaplama baglary (lentalary) öndürilýär. Hytaýyň enjamlary ornaşdyrylan kärhanada ini 8-16 millimetr, galyňlygy 0,5-1,2 millimetr aralygyndaky dürli reňkli baglar öndürilýär. Olar tegege saralan görnüşinde bolup, her tegekde 2 müň metre çenli bag bardyr.
TSTB-niň resmi web saýtynda habar berlişi ýaly, 2019-njy ýylda önümçilige başlan kärhananyň taýýar önümleri barlaghanada ýörite ornaşdyrylan enjamlarda synagdan geçirilip, olaryň galyňlygy, berkligi, çydamlylygy barlanýar. Bu kärhananyň önümçilik kuwwatlylygy aýda 144 tonna, ýylda 1728 tonna barabar. Baglar ýükleri elde we awtomatik usulda berkidip daňmakda ulanylýar. Olar görnüşine görä, 500 kilograma çenli agyrlykdaky ýükleri götermäge, saklamaga ukyply.
Içerki bazarda gaplama baglaryny ýyladyşhana şertlerinde ösdürilip ýetişdirilen oba hojalyk önümlerini gaplamak maksadynda alýarlar. Mundan başga-da bu önümler Russiýa eksport edilýär. Olara Belarus Respublikasynyň, Türkiýäniň işewürleri hem gyzyklanma bildirýärler.
Şeýle-de okaň:
