Ýakynda wirtual görnüşde Demirgazyk we Merkezi Aziýa (DMA) ýurtlary üçin COVID-19 soňra durnukly dikeldiş we 2030-njy ýyla çenli döwür üçin durnukly ösüş çygryndaky Gün tertibini ýerine ýetirmek üçin Maliýeleşdirmegiň toplumlaýyn milli gurluşy (MTMG) boýunça sebitleýin giriş okuwy geçirildi. Bu barada TSTB-niň resmi saýty habar berýär.
Aziýa we Ýuwaş ummany üçin ykdysady we durmuş topary (AÝUYDT) hem-de BMG-niň Okuw we ylmy-barlag instituty (ÝUNITAR) okuwyň gurnaýjylarydyr.
Çärä DMA ýurtlarynyň wekilleriniň we dürli ugurlar boýunça BMG agentlikleriniň işgärleriniň 120-den gowragy gatnaşdylar. Okuwyň dowamynda DMA ýurtlary (Türkmenistan, Gazagystan, Özbegistan, Gyrgyzystan, Azerbaýjan, Gruziýa, Ermenistan, Täjigistan) 2030-njy ýyla çenli döwür üçin durnukly ösüş çygryndaky gün tertibini ýerine ýetirmek boýunça işleriň bilelikdäki meýilnamasyny maslahatlaşdylar. Hususan-da, olar interaktiw görnüşde DÖM-i durmuşa geçirmegiň milli nusgalarynyň, olaryň maliýeleşdirilmesiniň tejribeleri, meýilnamalary we taslamalary bilen paýlaşdylar.
Okuw maslahaty 7 bölümçeden ybarat bolup, olar DÖM-i durmuşa geçirmek çygryndaky derwaýys meseleleriň giň gerimini öz içine aldy, ýagny: DÖM bilen baglanyşykly harajatlaryň hasaplanylmasy; DÖMI meýilleşdirmek we býujetleşdirmek (döwlet tarapyndan maliýeleşdirmek); Durnukly maliýeleşdirmäniň gurallary hökmünde maýa bazarlary we hususy maliýeleşdirme; MTMG-ni ornaşdyrmak boýunça çemeleşmeleriň we ileri tutmalaryň ýurtlar bilen ara alyp maslahatlaşylmasy.
