8 — 14-nji ýanwar aralygynda Gazagystan Respublikasynyň Almaty şäherinde matematika, fizika we informatika dersleri boýunça «XVI Halkara Žautykow» olimpiadasy geçirildi. Bu abraýly halkara bäsleşige ýurdumyzyň zehinli mekdep okuwçylaryndan saýlanan 3 topar — jemi 17 okuwçy gatnaşdy.
Bäsleşige 20 döwletden 600-e golaý okuwçy gatnaşyp, olaryň 250-si matematika, 170-si fizika we 160-sy informatika dersleri boýunça bäsleşdiler.
Ýurdumyzyň zehinli mekdep okuwçylaryndan saýlanan topara Aýratyn zehinli çagalaryň Saparmyrat Türkmenbaşy adyndaky döwlet mekdep-internatynyň matematika mugallymy Arslan Hojiýew bilen Balkan welaýatynyň Balkanabat şäherindäki ýöriteleşdirilen 22-nji orta mekdebiň fizika mugallymy Yhlas Apbasow ýolbaşçylyk etdiler. Halkara bäsleşikde matematika dersi boýunça Aýratyn zehinli çagalaryň Saparmyrat Türkmenbaşy adyndaky döwlet mekdep-internatynyň 10-njy synp okuwçylary Muhammetmyrat Goçmyradow, Kerim Çerkezow we Mary welaýatynyň Ýolöten etrabynyň 40-njy orta mekdebiniň 11-nji synp okuwçysy Söhbet Maksadow bürünç medallara mynasyp boldular.
Şu ýylyň ýanwar aýynyň 13 — 16-sy aralygynda Indoneziýa döwletiniň Bandung şäherinde hem «ISTEC» halkara ylym, tehnologiýa we Inženerlik bäsleşigi geçirildi. Mekdep okuwçylarynyň arasynda täze ylym-tehnologiýa görnüşleri boýunça tanyşlyk geçmek, pikir alyşmak, ylmy nukdaýnazary giňeltmek maksadyna eýerip, Bandung döredijilik jemgyýeti (BCS) bilen Indoneziýanyň Ýaş alymlar birleşiginiň (IYSA) bilelikde guramagyndaky halkara bäsleşige 15-den gowrak döwletden 180-e golaý okuwçy gatnaşdy. Lebap welaýatynyň Türkmenabat şäherindäki ýöriteleşdirilen 41-nji orta mekdepden biologiýa mugallymy Atamyrat Jumaýewiň ýolbaşçylygynda türkmen toparyndan zehinli okuwçylaryň 4-si gatnaşdy. Gazanylan netijelere görä, ady agzalan mekdebiň 10-njy synp okuwçylary Jennet Batyrowa biologiýa dersinden altyn medala, tehnologiýadan Dagbaşy Jumaýew kümüş medala, Gülseçil Ylýasowa bilen 9-njy synp okuwçysy Nabat Saryýewa bürünç medala mynasyp boldular.
