Türkmenistanyň futzal boýunça milli ýygyndysy Horwatiýada geçirilýän «Futsal Week Winter Cup» halkara ýaryşyndaky üçünji duşuşygynda Bosniýa we Gersegowinanyň ýygyndysyny ýeňdi.
Horwatiýanyň Poreç şäherinde geçirilen duşuşyk 6:2 hasabynda türkmen futzalçylarynyň ýeňşi bilen tamamlandy. Duşuşykdaky ýeňiş pökgülerini Mülkaman Annagulyýew (2 pökgi), Gurbangeldi Sähedow, Allamyrat Gurbanow, Abdylla Gurbannepesow we Myrat Annaýew geçirdi.
Bu duşuşykdaky garşydaşlarymyz FIFA-nyň reýtinginde 40-njy orny eýeleýär. Türkmenistan bolsa 69-njy basgançakda. Günüň beýleki bir duşuşygynda Çernogoriýa San Marinony 5:1 hasabynda ýeňdi.
Türkmen futzalçylary toparçadaky soňky duşuşygyny Çernogoriýanyň ýygyndysy bilen geçirer. Häzir biziň ildeşlerimiz 6 utuk bilen ýaryşyň birinji basgançagynda.
